مصطفى بكري لـ علاء مبارك: هات فلوسك من بره بلدك أولى بيها «فيديو»

رد النائب مصطفى بكري، عضو مجلس النواب، على ما جاء في تغريدات علاء مبارك، نجل الرئيس الراحل حسني مبارك، عبر "تويتر"، بعد الخلاف الذي تصاعد بينهما، جراء دفاع الأخير عن رجل الأعمال نجيب ساويرس.

وظهر بكري في مقطع فيديو نشره عبر صفحته الرسمية على موقع التواصل الاجتماعي "فيس بوك"، قال فيه: "بداية أحب أن أتوجه بالشكر إلى الدول العربية والمصريين في الخارج إللي وقفوا مع مصر في أزمتها الاقتصادية والأوضاع الصعبة بسبب الأزمة العالمية".

وتابع بكري: بناشد كل مصري وأولهم علاء مبارك وهو رجل طيب وابن أصول ومحدش يقدر يشكك في هذا، وبطلب منه تحويل الـ 429 مليون دولار الموجودين في بنوك سويسرا وأصبحو ملكه وأعلن هذا الكلام.

وأضاف بكري: حول الفلوس لمصر في الظرف ده، إحنا بنتكلم عن 500 مليون دولار تقريبًا، بدل ما نتكلم في كلام فاضي، لابد من قياس اللحظة التي تستوجب منك الوقوف بجانب بلدك اللي خيرها كتير عليك، وربنا يباركلك أنت والسيد جمال.

وقال بكري: أنا مستغرب إنك حاطط فلوسك برة مصر، أه هما يساوي 8 مليار جنيه، ولكن حولهم على بلدك، هو أنت مش واثق في بلدك ولا مش واثق في البنك المركزي، مستكملًا: اقف مع بلدك لإن دي المصداقية والوطنية، اقف مع بلدك لأنها ادتك كتير جدًا ووقفت معاك كتير جدًا، أنت وأسرتك، واتمتعتوا في خيرها كتير جدًا.

وواصل بكري: بتمنى اسمع منك رد عاجل وسريع، ومش هسألك الفلوس دي منين، جبتها من برة اشتغلت فيها جوة، هذه ليست قضيتي، هي قضية جهات أخرى معاك 8 مليار جنيه في 15 سنة، وده كفاح برضه، والشاب بيكافح، وكلها أساليب شريفة زي ما بتقول.

واختتم مصطفى بكري: رجع الـ 429 مليون دولار لبلدك، بلدك محتاجة للدولار الواحد، وياترى هتقف مع بلدك، أتمنى اسمع منك إجابة سريعة.