نجم الأهلي لـ «مصر 2030»: استمرارية فيوتشر ستكون أكبر من بيراميدز «فيديو»

علق أحمد فوزي نجم الأهلي السابق، على أداء رابطة الأندية المصرية في إدارة الكرة المصرية خلال الموسم الأول، بالإضافة إلى المقارنة بين بيراميدز وفيوتشر بالدوري.

وقال أحمد فوزي في تصريحات خاصة لـ "بوابة مصر 2030": "رابطة الأندية من أحسن الحاجات اللي اتعملت أخر كام سنة، الأول الفريق اللي مش عاجبه حاجة يعترض، ويقول لا مش هلعب أو مش عايز حكم معين، لكن دلوقتي قرارات رابطة الأندية بتمشي على الكل".

وتابع: "بالإضافة إلى تجربة دخول الجماهير، اللي اشتقنا ليها من 10 أو 12 سنة، اعتقد أن كل قرارات الرابطة حتى الأن إيجابية، واتمنى إنها تضع أسس خلال الفترة المقبلة كل الفرق تمشي عليها".

وعن المقارنة بين بيراميدز وفيوتشر، قال: "هناك فارق كبير بين الفريقين، بيراميدز يمتلك فريق من الأفضل في مصر، لكن فيوتشر فلوسه قليلة يمكن ربع بيراميدز، ومش بيدفعوا فلوس كتير نهائي".

وواصل: "اعتقد استمرار وجود علي ماهر على رأس الجهاز الفني لفيوتشر مساعد بشكل كبير على المستوى اللي بيقدمه النادي، لكن الأجهزة الفنية في بيراميدز بتتغير بشكل كبير، لكن تاكيس جونياس يعتبر أكتر مدرب استمر مع الفريق".

وأوضح: "بيراميدز كان أفضل في السنة الأولى لما كان عنده محترفين مميزين زي كينو، وكان بيقدم أداء مميز، وأخيرًا الفلوس مش بتعمل بطولات، الفلوس عامل مساعد، لكن التشيرت وقوة وروح الفرقة اللي بتعمل بطولات، بالإضافة إلى وجود الجماهير".

واختتم أحمد فوزي تصريحاته: "فيوتشر ممكن استمراريته تكون أقوى وأكتر من بيراميدز، وسيكون له جماهير بواقع جماهيرية اللاعبين الموجودين داخل الفريق من أنديتهم السابقة".