«أنا لازم أتشتم كل يوم».. خالد الجندي: نار جهنم فيها متسع لكل إنسان ينتحر - فيديو
عنف الشيخ خالد الجندي، عضو المجلس الأعلى للشؤون الإسلامية، بعض الشباب الذين يراسلونه بأنهم تعرضوا للظلم ويريدون الانتحار والتخلص من حياتهم، قائلا: "كل شوية يجيلك شاب طول بعرض يقولك هنتحر، يا عم تنتحر ولا تروح في داهية، البشرية نقصت أرشميدس يعني؟".
وأضاف الجندي، خلال برنامج "لعلهم يفقهون" والمذاع عبر فضائية "دي إم سي"،: "تسأل ليه عايز ينتحر يقولك عشان ظلموني، طب يا حبيبي داحنا ملطشة ظلم، وعايشين في الدنيا الراعي الرسمي للمظلومين في البشرية، معقبا: "ده اليوم اللي ما أتظلمش فيه وما أتشتمش فيه على مواقع التواصل بحس إني عاصي لله ومقصر، لازم أتشتم كل يوم".
وتابع: "اللي عايز ينتحر ما تروح في داهية، إلى نار جهنم وبئس المصير، هتنتحر هتروح جهنم وبئس المصير، معقبا: "نار جهنم فيها متسع لكل إنسان يقتل نفسه".
وأكمل :"يجي حد يقول هموت وأخلصكم من حياتي، والناس على السوشيال ميديا تقول معاك حق يا بني، ظلموك الأندال ظلموك الجبناء، هو مين متظلمش، ولكن مطلوب منك تجاهد لآخر نفس ضد الظلم، مش إن حضرتك تخرج من الملعب وتنتحر وتقول مش لاعب، لأنك هتدفع تمن ده وتنتحر، والتمن هيكون نار جهنم".
وأردف: "أيضا أي شخص يسمع لآخر وهو يردد عبارة أنا هنتحر، ويقول له معك حق أنت مظلوم وظلموك ولا يعينه على الصبر والمقاومة مشارك في قتل نفس وسوف يحاسب عليها أمام الله".
