شوبير محذرًا الخطيب: «متحطش ودنك للجماهير.. فيها إيه لما تخسر دوري»
تحدث الإعلامي أحمد شوبير نجم الأهلي السابق، عن مستوى البرتغالي ريكاردو سواريش المدير الفني للفريق الأول لكرة القدم بالنادي الأحمر، بعد تردد أنباء عن إقالته بنهاية الموسم الجاري.
وقال شوبير في تصريحات إذاعية عبر برنامج "مع شوبير" المذاع عبر راديو "أون سبورت": "سواريش بدأ اللعب باللاعبين الصغار من مباراة مصر المقاصة، بالإضافة إلى فقدانه عددا كبيرا من اللاعبين الأساسيين بسبب الراحة".
وتابع: "كانت النتيجة ظهور عدد كبير من اللاعبين المميزين والحكم في الآخر سيكون للجماهير، مفيش شك إن الأهلي كسب حارس كبير زي مصطفى شوبير، ومحمد فخري وأحمد سيد عبد النبي، ومحمد أشرف ظهير أيسر واعد، أحمد سيد غريب مهاجم واعد، هل هناك خلاف على ذلك".
وشدد: "أنت مش لازم تاخد كل البطولات"، مشيرًا: "أنا معرفش قرار الأهلي في اللي جاي إيه، في ناس بتقول الراجل ماشي ومحدش عارف مصيره إيه، الراجل عنده حق في اللى حصل بعد مؤتمر مباراة إنبي، لما رفض يرد على أسئلة الصحفيين".
وتابع: "الراجل مش بيعلب معاه، الشناوي، أليو ديانج، ياسر إبراهيم، علي معلول، أفشة، عمرو السولية، وحمدي فتحي وتقريبا مش معاه 20 لاعبا، فانت حضرتك مستعجل في الحكم عليه ليه، أنت خسران دوري خلاص، وموضوع الدوري أصبح منتهيا من بدري، لكن إيه المانع أنه يجرب ويتفرج على اللاعبين الشباب".
وأضاف: "ما الأهلي كسب 42 دوري فيها إيه لما يخسر 2، وأنا هتكلم بصراحة يا إدارات الأندية، متحطش ودنك للسوشيال ميديا، حط ودنك للي إنت شايفه، لو شايف أن سواريش مشروع كويس خلاص يكمل".
وأوضح: "الزمالك لو حكم على فيريرا زى ما بيحصل مع سواريش، كان مشي من بدري بعد ما خسر من طلائع الجيش وإنبي، فالمفروض الحكم يتغير".
واختتم شوبير تصريحاته: "يا إدارة الأهلي شوفوا الدنيا عاملة إزاي لنهاية الموسم، ومتحكموش على المدرب بالنتائج حتى لو خسر المباراتين، شوفوا عمل إيه مع اللاعبين الشباب، فلو سواريش رحل بنهاية الموسم البعض هيقول أنه كان لابد من منحه الفرصة كاملة".
