«خليكوا محترمين».. مرتضى منصور يفتح النار على جماهير الزمالك

وجه مرتضى منصور رئيس نادي الزمالك رسالة قوية للجماهير، بشأن التعاقد مع الثلاثي زكريا الوردي وأحمد أيمن منصور، وإبراهيما نداي خلال الانتقالات الصيفية الجارية.

وقال مرتضى منصور في تصريحات عبر قناة "الزمالك": "اللي بيكلمني عن الصفقات من الجماهير، حد بعت سألني فين الصفقات الفاشلة، بقوله يا ابني عيب خليك مؤدب ومحترم، انت عارف إحنا جبنا مين، انت ملكش دعوة، انت مشجع محترم من الجمهور المحترم انت متدخلش أوضة العمليات والدكتور بيعمل عملية لأخوك انت ليك إن العملية تنجح انت مالك.

وتابع: "هو إبراهيما ناداي اللي مكسر الدنيا مش عاجبك، وزكريا الوردي اللي بيقوم بدور ساسي وطارق حامد من غير ما ياخد إنذار أو يطرد، وأحمد أيمن منصور لاعب سوبر وبيلعب في أكثر من مركز وجاي مجانًا".

وردًا على سؤال من يختار صفقات الزمالك، رد موجهًا حديثه للجماهير: "عايزين تدخلوا انتوا، أنا رئيس النادي المفروض مين اللي يتدخل، واحنا بنعرض على فيريرا الصفقات قبل التعاقد معاها".

واختتم رئيس الزمالك تصريحاته: "يا جماهير الصفقات اللي انتوا بتحلموا بيها وأكتر، بس من غير ما تفرضوا رأيكو عليا، كل أعضاء مجلس الإدارة لا يعلموا من هم الصفقات، والملعب هو الفاصل بينا".