علاء مرسي: «أنا صاحب 30 سابقة عاطفية ومراتي عارفة.. ولو رجع بيا الزمان هعرض الزواج على ميرفت أمين»

كشف الفنان علاء مرسى خلال لقائه فى برنامج الستات الذى تقدمه مفيدة شيحة وسهير جودة، ويعرض على قناة النهار، عن تقديره للمرأة، قائلا: "أنا عاشق للأنثى وبعرف أدلعها وأحبها من قلبى لأن الست هى الخير اللى فى الدنيا والحياة، إزاى ينفع نظن فى الست سوء حتى ولو هى سوء فهى أساس حياتى علشان كده أنا بحب الأنثى وعاشق لها".

وتابع: "أنا صاحب 30 سابقة عاطفية وفعلا حبيت 30 مرة وعشت تجاربهم من حب وفعل وأكشن ومشاكل وصراعات، وبيحصل ود فجأة وبيقلب معايا لإعجاب وبعدين حب، وأنا شهيتى مفتوحة طول الوقت للحب ولو الست قالتلى كلمة حلوة بحبها علطول، ومراتى عارفة كل حاجة وعمرى ما خبيت أى حاجة، ولكن هى بتزعل فى الأول وبعدين بتسامح، ومراتى عرفتنى من أول يوم وعرفت تركيبتى وحبت ترتبط بيا وأنا انسقت ليها لسبب إن عندها اهتمام كتير بكل التفاصيل".

وأضاف: "الفنانة ميرفت أمين حب عمرى واللى اتكلموا عليها أشباح مش بشر، وميرفت هى عارفة إنى بحبها وأحبها كل أنواع الحب واكتشفت إن بينافسنى فى ده بشر كتير جدا، ولو كنت عرفتها فى زمن تانى وسن تانى كنت هعرض عليها الزواج بس هى مكنتش هتوافق لأن كان عندها رشدى أباظة وحسين فهمى".