مرتضى منصور لـ إعلامي سعودي: أنا مش شحات.. وقول للخطيب يرجع الـ228 مليون

رد مرتضى منصور، رئيس مجلس إدارة نادي الزمالك، على هجوم الإعلامي السعودي أحمد العجلان، بعد تصريحاته الأخيرة، بشأن مطالبته بالحصول على مكافأة الفائز بكأس لوسيل.

وقال مرتضى منصور في تصريحات بالمؤتمر الصحفي بنادي الزمالك: "لو كان فيه مكافأة مركز تالت في كأس لوسيل، كنت هطالب أخدها، والخطيب مش أحسن مني".

وتابع: "أنا مش شحات، وفيه بلاع متقدم من تركي آل الشيخ الوزير في بلدك، ضد محمود إبراهيم الخطيب أنه أخد الساعات والفلوس المقدرة بـ100 مليون دولار".

وواصل: "أنا الشحات هتبرع بالمليون دولار لدار أيتام للبلد اللي مطلعة الشيك، وأنا معرفش طالع من قطر ولا السعودية، لأن الزمالك أغني منكوا، ومستني موافقة وزارة الشباب والرياضة".

وشدد: "قول لمحمود الخطيب يرجع 228 مليون جنيه والساعات لتركي أل الشيخ، علشان تعرف مين اللي شحات، واتحداك أنه سلم الفلوس لصندوق تحيا مصر".

ووجه رسالة لمحمود الخطيب: "أنا قفلت صفحتك، لكن الراجل قارن بيني وبينك فكان لازم أرد، وعايز بيان من تحيا مصر علشان أقول تحيا محمود الخطيب".

وشدد: "أنا مش باخد تعليمات من حد، والتعليمات بتيجي من ضميري ومصلحة بلدي، ولما قولت أن الخطيب أسطورة مكنش تعليمات".

واختتم مرتضى منصور تصريحاته: "أنا رئيس نادي الزمالك، يبقى أنا رئيس العالم كله، ومش عايز حاجة من رئيس الجمهورية أو المخابرات، وعايز بلدي تبقى أحسن بلد في العالم، وشعبي الأعضم، ونادي الزمالك يبقى أحسن نادي في العالم".