مش هتقعد تشتكي من الدبابيس.. القيعي يفتح النار على مرتضى منصور بسبب عقود الرعاية
فتح عدلي القيعي رئيس شركة الكرة بالنادي الأهلي، النار على مرتضى منصور رئيس نادي الزمالك، بسبب الفارق الواضح بين عقود رعاية الفريقين.
وقال القيعي في برنامج ملك وكتابة عبر قناة النادي الأهلي الرسمية: "كل واحد يفصل على نفسه القاعدة اللي تريحة، المسألة مش مسألة منطق بقى، متابعًا الأهلي مش هو اللي بيدي نفسة الألقاب دي ولا التقديرات دي".
وتابع: "والله حاجة تضحك! لما تيجي تتكلم عن الرعاية، وبعدين هو يعني أية مش هنقبل بكذا، دة واحد عندة منتج بيقولك هديك فلوس عشان تحط إسمي على قميص فريقك، هتجبره ازاي يديك اللي انت عايزة مش اللي هو عايزة".
وأضاف: "أنت تقدر تقولة لا مش هديلك حق الرعاية بتاعي، لكن متقدرش تقولة اديني كذا زي الأهلي، مضيفًا يقال إن العقد ممضي من بدري في الزمالك بتاع البث، والبث لايختلف عن الرعاية".
واستكمل: "لما يجي نادي يعمل مفاجأة زي ليستر سيتي في إنجلترا من عامين، هو دة نادي عندة قاعدة جماهيرية زي مانشستر يونايتد مثلًا، يعني ممكن حد من ليستر سيتي يطلع يقولك عايز أخد عقود رعاية أكتر من مانشستر يونايتد".
واختتم: "حجم الرعاية وحجم البث في الطبيعي مش في أيد حد دة السوق اللي بيقول عليها، وأشكر الأستاذ مرتضى منصور رئيس نادي الزمالك، وصاحب الفضل أن البث يصبح منفرد، عندما كان رئيس لجنة الأندية، ودة اللي كان يسعى له الأهلي من فترة".
