بالفيديو.. إلهام شاهين تثير الجدل بتصريحها :مش هناخد برأي الدين
أكدت الفنانة إلهام شاهين أنها ترفض إصرار البعض على العودة إلى رأي الدين في مسألة التبرع بالأعضاء، حيث قالت :«أنا شايفة إنه موضوع مهم جداً جداً، موضوع إنساني قبل أي شيء، وكفاية بقى يفضلوا يقولوا طب نسمع رأي الدين».
وتابعت :«كل الشيوخ المحترمين قالوا لنا رأي الدين وإن ده هيبقى صدقة جارية على روح المتوفى، بعد ما أموت أجزاء مني إذا كان فيه أجزاء صالحة وتقدر تشفي أي مريض ودي صدقة جارية على روحي ومش بس أنا بفيد المريض أنا بفيد نفسي».
وأوضحت أنها سألت مجموعة من الشيوخ، قائلة :«أنا سمعت آراء من الشيخ خالد الجندي والدكتور سعد الهلالي، وده رأي الدين والناس بقى تبطل تجادل في هذه الأمور واللي عايز يعمل خير يعمل خير واللي مش عايز هو حر وإحنا مش هنحاول نقنعه يعمل خير لكن ميهجمناش ويمنعنا إحنا من عمل الخير ناس بتهاجم بتقول حرام، حرام إيه يابني متروح تسأل الشيوخ».
وأشارت إلهام شاهين إلى أن هناك حجج من مهاجميها، حيث يقولون:جسمك ده مش ملكك وده ملك الله وانتي مش من حقك تتبرعي بيه وانتي كده تبقي ضد الدين.
وتساءلت :فيه واحد مات غرقان والسمك أكل جسمه وواحد اتحرق وواحد مات في حادثة واتفرم وده هيعمل إيه وهيتحاسب إزاي؟"، معتبرة "أن هذا الكلام مفيهوش منطق ولا علم ولا دين وأن هؤلاء معارضون للخير عموماً.
وكشفت إلهام شاهين أنها لم تقر رسميًا التبرع بأعضائها بعد وفاتها في الشهر العقاري، حيث قالت :أنا عاملة فيديو صوت وصورة وأنا بقول إني متبرعة بأعضائي بعد الوفاة.
