محمود سعد يدعم ويجز: «بيأسس لفن جميل تعالوا نساعده»
انتقد الإعلامي محمود سعد، نقيب المهن الموسيقية مصطفى كامل، بسبب الشروط التي وضعها مؤخرًا على مطربي الراب، بعدما ألزمهم بالغناء مع فرقة موسيقية وألا يقل عدد العازفين عن 6.
وقال محمود سعد في فيديو عبر حسابه الشخصي، بموقع التواصل الاجتماعي فيس بوك: "أغنية كله على كله لما تشوفه قوله، لما كنا صغيرين كنا بنغنيها لكن الصحافة دبحوا عدوية".
وأضاف سعد: "شفت حفلة لويجز وشفت منظر رهيب فكرت إنها صورة مش حقيقية، ولكن حضرها 52 ألف والناس تهاجم ويجز".
وتابع: "أنا مستغرب شروط مصطفى كامل لما قال لازم مطربي الراب يغنوا بفرقة دي حاجة عجيبة مفيش حد يشترط على مطرب يغني ازاي غير الملحن، معقبا: "الغنا ده حياة الروح لأنه الفن الوحيد اللي ممكن يمارسه أي حد في أي حتة وأي مناسبة، لأنه بيعبر عن الناس مش هنخلي الناس تغني على مزاجك، هو حر ليه تشتموه الغناء مزاج مكانش يبقى فيه فايزة ونجاة ووردة وشادية وأنغام وشيرين".
وأكمل: "لما طلعوا الحنفية الناس قالوا محدش يتوضأ من الحنفية؛ لأنهم كانوا بيتوضوا من الترعة ودايما الجديد بيكون عامل قلق، معقبا: "الدنيا اتغيرت ويجز مش بيحتك بأمور سياسية ولا بيمس أمور دينية ولا بيقدم حاجات فيها إباحية، ويجز بيأسس لفن جميل تعالوا نساعده يمكن محتاج مساعدة، ومحتاج آراء داعمة وفي 52 ألف شخص نزلوا يسمعوه في حفله الأخير وأغانيه على يوتيوب جايبة 100 مليون".
