مرتضى منصور يرد على غلق قناة الزمالك.. ويؤكد: «أنا أسد مش بخاف»
كشف مرتضى منصور رئيس مجلس إدارة نادي الزمالك، حقيقة إغلاق قناة الزمالك الفضائية، بعد قرار المجلس الأعلى للإعلام، في التحقيق بشأن التجاوزات.
وقال مرتضى منصور في فيديو مصور عبر موقع "يوتيوب": " في ناس كتير كانت بتسأل هل قناة الزمالك هتتقفل بعد اللي قولته في حلقتين الخميس والجمعة؟، أولا أنا مش ندمان ومش زعلان، وقناة الزمالك مش هتتقفل، لو عايز تحاسب حاسب اللي بيتكلم، وأنا اللي كنت بتكلم ودول كانوا ليلتين في حب مصر".
وتابع: "وعلى فكرة أنا عايز أنبه اللي زعلانيين هما الخونة والفاسدين واللي مش عاجبهم يبقى في 200 مليون مصري وعربي حول العالم، قاعدين بيسمعوا كلامي".
وواصل: "معنديش مشكلة لو الأستاذ كرم جبر عايز يحقق أهلًا بيه، إنما بعيدًَا عن القناة، وأنا متحمل مسؤولية كل كلمة قولتها، ودا علشان خاطر بلدي".
واختتم مرتضى منصور تصريحاته: "أنا بطمن الناس عليا، أنا أسد مش بخاف، أهلًا وسهلًا بكرم جبر، ولو فيه تجاوز مفيش مشكلة، أنا فضحت المتآمرين وكنت من اللي أفشلوا ثورة 11 وأنا مش ندمان ولا زعلان، لأن أنا ماشي بمبدأ لو خفت متتكلمش ولو اتكلمت متخفش".
