بالفيديو.. عمرو أديب: زكريا بطرس قليل أدب حقير والكنيسة «شلحته»
شنّ الإعلامي عمرو أديب هجومًا عنيفًا على الكاهن المشلوح زكريا بطرس؛ بعد تجاوزه بحق الدين الإسلامي، قائلًا: «أنا اشتغلت معركة من 15 سنة ضد المدعو زكريا بطرس وتصدينا له وكنت أعمل في قناة مشفرة، وقلبنا الدنيا على دماغه ودماغ اللي جبوه قليل الأدب سافل ومنحط وقدرنا نخرسه، والبابا شنودة الله يرحمه شلحه أصبح كاهنًا مشلوحًا».
وأكمل أديب، خلال تقديمه برنامج «الحكاية» المذاع عبر فضائية «إم بي سي مصر»: «مرّت السنين ورجع تاني زكريا بطرس ويمارس بذاءاته ضد الإسلام، يا جماعة مصر عدت المرحلة دي خلاص ليس عندنا أقليات وليس عندنا فتنة طائفية، انا بقولكم عشان شايف الكورة بتلف، طلع هاشتاج ضد زكريا بطرس، لأنه قايل كلام حقير زيه، فيه ناس دخلت تلعب في النص، خلوا بالكم يا جماعة الحذر الحذر، الوعي الوعي، واعرض عن الجاهلين ده جاهل وفرد، العلاقة بين المسلمين والمسيحيين في مصر علاقة مساواة، وحقوق»
وأردف مقدم البرنامج: «الراجل ده بيتم استخدامه وإعادة تصديره لإعادة الفتنة موتوه في المهد، الكنيسة طلعت بيان وقالت ده لا يمثل إلا نفسه، يمثل جاهلية، وعفن، وكره، وحقد، هو لا يساوي شيئًا، اكشفوا الملعوب وخدوا بالكم احنا والمسيحيين إخوات، احنا بنحترم أديان ومعتقدات بعض».
