حسين الشحات محذرًا من الشيطان: «بيتفنن إزاي يكبّر مخاوفك»

وجه حسين الشحات لاعب الفريق الأول لكرة القدم بالنادي الأهلي، رسالة غامضة منذ قليل، عبر حسابه الرسمي على موقع التواصل الاجتماعي "فيسبوك".

وكتب الشحات عبر حسابه في "فيسبوك": "لو ركزت مع ألاعيب إبليس هتلاقيه في معركة يومية معاك، عشان يلهيك بالحزن والقلق، بيحاول كل يوم يدوّر على أي حاجة يخليك تقلق عليها".

وتابع: "بيتفنن إزاي يكبّر مخاوفك ويقنعك بإن كل الي جاي سيء جدا، ويدعو للخوف والحزن وعدم التفاؤل".

وواصل: "الشيطان أدرك، قبل ما ناس كتير تدرك حقيقة إن سوء ظنك بالله ممكن يشكّل خطر حقيقي على مستقبلك ويخلي مخاوفك تتحقق لمجرد إنك اعتقدتها وآمنت بحدوثها".

وأضاف: "الشيطان عرف قبل ماناس كتير تعرف، إن حزن المؤمن هو أكتر حاجة بتعطّله وتكتّفه وترجّعه 100 خطوة لورا".

وأكمل لاعب الأهلي: "الشيطان لما بييأس منك ومن مقاومتك لنفسك، ممكن يبعتلك مخاوف جديدة على ألسنة الناس حواليك، يوسوس لصحابك وقرايبك بدلاً عنك، يقنعهم بفكرة ينقلوهالك عشان يحاربك من الخارج زي ما حاربك من الداخل".

وشدد: "قاوم نفسك وحاول تحوّل مخاوفك لإحسان ظن بالله، عشان ماتقعش في مصيبة سوء الظن بالله وانتظار تحقق مخاوف قادمة لا محالة إن أنت بها ظننت وأيقنت وآمنت".

واختتم حسين الشحات: "كل مازاد خوفك زوّد وِردك من القرآن، وحارب الخوف بالقيام والاستغفار واللجوء لله بالدعاء والصيام".