مرتضى منصور: «الزمالك فاز على سموحة.. فين حقي أنا وولادي؟»
علق مرتضى منصور رئيس الزمالك، على فوز الفريق الأول لكرة القدم بثلاثة أهداف مقابل هدف، على حساب سموحة، في المباراة التي جمعتهما أمس الاثنين.
وقال مرتضى منصور في تصريحات مصورة: "أنا بقالي أسبوع مجتش النادي وجايب الدوا بتاعي معايا، أنا بشكر ربنا إنه إدالي شوية صحة أجي النادي".
وواصل: "أنا مجتش لـ 3 أسباب، الأول كنت تعبان، والتاني إني حلفت مش هدخل النادي إلا لما كل عامل وفريق رياضي ياخد مرتباته، بيتقال مرتضى جبار ولكن أنا مقدرش أبص في وش عامل ليه فلوس".
وشدد: "بحمد ربنا إن المؤامرة فشلت، بقالي أسبوع بتشتم أنا وأمير وأحمد، أنا عندي سؤال بعد ما شوفت تحليل مباراة سموحة في قناة أون والزمالك، قعدوا يتكلموا ساعتين في عبقرية فيريرا وده صح، و3 ساعات في عبقرية اللعيبة وده صح، و5 ساعات في عبقرية الملعب وده صح".
واختتم مرتضى منصور تصريحاته: "طب الراجل اللي عدى الأزمة، وكانت أزمة كبيرة ده ميتذكرش لا، بيتذكر بس في الهزيمة، والمفروض إن الناس دول محايدين، أنا سعيد إنهم أشادوا بالراجل واللعيبه، لكن فين حقي أنا وولادي".
