«طبطب على ابنك».. مرتضى منصور يوجه رسالة لوالد نجم الزمالك بعد تألقه

علق مرتضى منصور رئيس مجلس إدارة نادي الزمالك، على تألق سيف فاروق جعفر خلال مباراة سموحة بالدوري الممتاز.

وحقق الفريق الأول لكرة القدم بنادي الزمالك، فوزًا مهمًا على حساب سموحة بثلاثة أهداف مقابل هدف، في المباراة التي جمعتهما ضمن منافسات الجولة الثامنة عشر من مسابقة الدوري.

وقال مرتضى منصور في تصريحات نقلها عبر قناة "يوتيوب": "عندنا مكاسب كتير من مباراة سموحة، كسبنا سيف جعفر و110 مليون تمن بيع إمام عاشور، لأنه أثبت إنه أحسن من إمام، ولاعب لسه صغير وربنا يوفق إمام".

وتابع: "سيف أحسن من أبوه 100 مرة، وبقوله طبطب يا فاروق على ابنك، لأنه مبيكلموش، ولا بيسانده لما بيتألق، وكان عاوزينه يمشي إعارة وأنا رفضت".

وشدد: "بحمد ربنا إن المؤامرة فشلت، بقالي أسبوع بتشتم أنا وأمير وأحمد، أنا عندي سؤال بعد ما شوفت تحليل مباراة سموحة في قناة أون والزمالك، قعدوا يتكلموا ساعتين في عبقرية فيريرا وده صح، و3 ساعات في عبقرية اللعيبة وده صح، و5 ساعات في عبقرية الملعب وده صح".

واختتم مرتضى منصور تصريحاته: "طب الراجل اللي عدى الأزمة، وكانت أزمة كبيرة ده ميتذكرش ليه، بيتذكر بس في الهزيمة، والمفروض إن الناس دول محايدين، أنا سعيد إنهم أشادوا بالراجل واللعيبه، لكن فين حقي أنا وولادي".