«مشروع عمري ضاع».. أحمد التهامي يتهم صناع فيلم ”تاج” لـ تامر حسني بسرقة فكرته

أثار الفنان أحمد التهامي جدل كبير حول فيلم "تاج" للفنان تامر حسني، ووجه التهامي اتهام لصناع العمل بسرقة فكرته التي أكد أنه سجلها في الشهر العقاري باسمه.

ونشر التهامي على حسابه الشخصي بموقع التواصل الاجتماعي فيس بوك، كاتبًا: "أنا سكت كتير عن حقي عشان ما زعلش حد مني.. اتشلت من أدوار كتير وقولت مش مهم ولحد دلوقتي مش واخد حقي الفني والأدبي والمادي اللي يليق بمجهودي وتعبي في مشواري الفني وقولت كل شيء نصيب والحمدلله على حب الناس والدنيا مستورة والحمدلله".

وتابع: "إنما توصل إن مشروعي مشروع عمري اللي أنا تعبت فيه في كتابته ولفيت بيه على معظم شركات الإنتاج ولسه عندي يقين وإيمان بالله إن هيجي يوم واعمله يتسرق مني، ويعمله حد تاني بغض النظر ده فيلمي ومشروعي وأنا أول واحد من ١٠ سنين فكرت في فكرة البطل الخارق وطول الفترة دي كان يتسرق أجزاء من الفيلم وأقول عادي.. إنما (التوأم الخارق) ده بتاعي ومسجله في المصنفات والشهر العقاري".

وأضاف: "تامر حسني صاحبي وأخويا وأكيد مايعرفش المعلومة دي أرجو الرسالة توصله لأن أكيد في ناس كتير مؤذية وحسبي الله ونعم الوكيل، أنا حاولت أوصل لـ تامر حسني ومعرفتش".