«الجماهير بتموت».. شوبير يفجر مفاجآت بشأن الصراع على رئاسة الزمالك

شن الإعلامي أحمد شوبير، هجومًا عنيفًا على أعضاء مجلس إدارة نادي الزمالك، بشأن الأزمة الأخيرة حول اختيار القائم بأعمال رئيس النادي عقب حبس مرتضى منصور.

وقال شوبير في تصريحات عبر برنامجه الإذاعي "مع شوبير" المذاع على "راديو أون": "سليمان وهدان عضو مجلس الإدارة، أعلن تم تكليفه برئاسة نادي الزمالك مؤقتًا، في الوقت اللي كان فيه عدد من الإعضاء مع الفريق في تونس".

وأضاف: "الزمالك راجع خسران من تونس، وفرصه في التأهل بقت صعبة جدًا، لكن إزاي بقى دي، رئاسة نادي الزمالك، بدل ما نشوف الفريق الخسران ونعالج الأسباب، بيحصل خناقات على مين الرئيس، فالاستاذ خالد لطيف أمين الصندوق، قال إن التصويت تم و3 أعضاء مش موجودين، ولازم نعيده تاني".

وأوضح: "بيحصل حاليًا تربيطات بين الأعضاء، الـ3 اللي تحت السن وجمال عبد الحميد مع خالد لطيف، والناحية التانية فيه ناس، ولما المجلس اجتمع إمبارح معرفوش يوصلوا لحاجة، فهجتمعوا تاني النهاردة".

واختتم شوبير تصريحاته: "يعني الجماهير هتموت على المستوى المحلي والإفريقي، وأنت رايح تتصارع على منصب، هو دا ينفع؟ ولا دا كلام، وترجعوا تتهمونا إحنا، وأنت جاي تتخانق علشان رئيس النادي وهو مغلوب في إفريقيا، وترجعوا تقولوا بنحب نادي الزمالك".