شيرين رضا: وجود والدي كسر دوري.. والبنات بتسمع الكلام عن الولاد

نصحت الفنانة شيرين رضا الأمهات، بعدم السماح لأزواجهن بضرب بناتهم، كما كشفت عن رأيها في الفرق بين تربية الأولاد والبنات.

وقالت شيرين رضا في تصريحات صحفية: «في ربات منزل بتسمح لأجوازهم يمدوا إيدهم على بناتها، وده فعل غير مقبول، إنتي كأم اختارتي تجيبي طفل الدنيا دي مش ذنبه هو، عشان كده لازم تحافظي عليه لحد ما يكبر، ومينفعش تسيبيهم لأي حد يلطش فيهم حتى لو كان مين».

وتابعت:«بشوف البنات بتسمع الكلام أكتر من الولاد، بس مقدرش أحكم وأقول مين اللي تربيته سهلة لأن في الحقيقة عندي بنت واحدة».

وكشفت شيرين عن رأيها في مشهد ظهور والدها:«مكنتش راضية على المشهد ومعترضة عليه، لأن أنا ليا 20 حلقة عايشة دور نادية، بظهور محمود رضا كسر الشخصية، ورجع الجمهور لـ شخصية شيرين رضا».

وختمت حديثها:«أنا بحب شخصية نادية جدا في مسلسل وبينا ميعاد، بس هي في الحقيقة لا تشبهني، أنا مش أم صارمة، وأنا أمي مربتنيش كدا ولا ربيت بنتي كدا، بس ده ميمنعش إني حبيتها لأنها حقيقية ومسكينة وبحترمها لأنها عرفت تربي بناتها واختارتهم بدل حبيبها».