منة فضالي: «اتعلمت أعيش لوحدي والأب اللي بيسيب عياله وهم صغيرين بيخسرهم العمر كله»
حلت الفنانة منة فضالي ضيفة في برنامج «VIP»، مع الإعلامية أميرة بدر على قناة «هي»، وقالت: «عندى إخوات من بابا منهم أخ بيلعب مزيكا وشغال في أوروبا، وعندي واحد بيلعب تنس وباسكت وكان محترف في أمريكا، ودول اللي أعرفهم واتنين من زوجة تالتة ما أعرفهمش ولا عمري شُفتهم».
وتابعت منة: «أنا كبرت واتعلمت أبقى قوية واتربيت أبقى لوحدي، ومش خسرانة إن إخواتي يكونوا بعيدين عني».
وأضافت: «أمي ست بـ100 راجل وتعبت جدًّا معايا وكانت ست مكافحة وبتشقى وتتعب علشان تكبرني وما تحرمنيش من أي حاجة، أنا ما كنتش بشوف ماما خالص ببقى نايمة علشان عندي مدرسة الصبح، وهي كانت ماسكة شركة مدرب كاراتيه ياباني وتتولى رعايتي وتربيتي وأبويا ماكانش موجود في الصورة خالص».
وكشفت منة باكية: «عمري ما حسيت إن عنده مشاعر ناحيتي، أنا عمري ما حسيت إنه بيحبني نهائي أبدًا مع إني حاولت أقرب منه، بس هو ماساعدنيش وكان بعيد طول الوقت، ممكن علشان أنا ما اتربتش معاه أو ما تعبش عليا، الحب والمشاعر والأحاسيس ما حدش بيطلبها لازم تبقى من جواه وما دام مش موجودة خلاص، وما عنديش حاجة أقولها له».
واختتمت: «من قريب كنت بعمل مسرحية في السعودية، وبابا عايش في السعودية، فكلمته وقلت له عايز أشوفك وتعالَ نتغدا مع بعض، وجالي لكن لقيت نفسي طول الوقت بقوم ومش قاعدة معاه ومش لاقية حاجة أقولها له، وهو كان عايز يحضر المسرحية، لكنه سقط من ذاكرتي فبعت لي رسالة إنه ما حضرش فاعتذرت له».
