لوسي لـ«مصر 2030»: «حصلتلي مواقف غريبة بسبب المداح وبقول للجنية هند بنت الأحمر ده شغل سبيني أكل عيش»
كشفت الفنانة لوسي لبوابة «مصر 2030»، إنها بحثت كثيرًا عن تفاصيل دورها «هند بنت الأحمر»، الذي تقدمه في مسلسل «المداح - أسطورة العشق-الجزء الثالث»، وذلك لتقديم عمل ناجح وقوي.
وتابعت: «لكن حدث معي الكثير من المواقف الغريبة، في يوم روحنا الفيوم للتصوير، وعملت مكياج وكل حاجة وقلت هلبس لبس الجنية في فيلا صابر علشان المسافة من الفيلا للفندق بعيدة ومبقاش لابسة اللبس ده والدنيا حر جدا قبل ما اخش علي اللوكيشن في الفيلا بـ4 دقايق لقيت المخرج المنفذ هشام فتحي بيقولي انت فين ارجعي للأوتيل فيه عاصفة قوية والشجر بيخبط في بعضه، فقلت له مفيش حاجة على الطريق اللي جاي فيه، فقلت له أنا داخلة على الفيلا».
وأضافت: «وأنا داخلة مكان التصوير وفيه شجر ومفيش عاصفة ولا حاجة دخلت رسيبشن الفيلا في الفيوم لقيت الرموش الطويلة اللى مركباها بتتهز جامد من الهواء، وهما مقفلين فتحت لقيت الهواء بينطرني، فقلت بركاتك يا ست هند الأحمر ملكة الجن وقلت لهم سلام عليكوا ومصورتش».
وكشفت لوسي: «بس أنا بعد كل مشهد كنت بقرأ قرآن عشان يحفظني، هي هند أكيد عارفه إن ده دور بمثله وكنت بقولها ده شغل سبيني أكل عيش».
