ميس حمدان: هيفاء وهبي مبتحبنيش .. وهي مؤدية مش مطربة

كشفت الفنانة ميس حمدان، تفاصيل خلافاتها مع الفنانة هيفاء وهبي، أثناء تقديمهما سويا برنامج “شكلك مش غريب” على شاشة إم بي سي قبل عدة سنوات.

وقالت ميس حمدان خلال برنامج “vip" مع الإعلامية أميرة: “أنا كنت حاسة هيفاء مكنتش حباني ودي حاجة ترجعلها، ومش مطلوب الكيميا تكون موجودة بيني وبينها، مكنتش بتديني الدرجات الصح وبتقلل من درجاتي، ومش حباني ولو غارت مني مش هيبقى غلط هو أنا ميتغارش مني؟

واستكملت ميس حمدان حديثها: هي أنجح وأجمل بكتير وهي ساعتها أنا كنت فين وهي فين، لا أقارن نجاحي بنجاحها رحم الله امرئ عرف قدر نفسه، وده لا يقلل من شأني أنا كنت صغيرة ومبدعة في الفقرات اللي كنت بقدمها، وكان في مشهد بعلق على أغنية لأصالة واستاءت بدون سبب.

وأضافت ميس حمدان: بشوف هيفاء ممثلة جيدة وعندها كاريزما قوية جدا ومجتهدة وملكة الإغراء بلا منازع المفروض كل اللي بيغنوا يدعوا ليها وفتحت فرصة للبنات الحلوين انهم يغنوا، هيفاء مؤدية مش مطربة يعني جورج كلوني مبشوفهوش ممثل كويس ولكن عنده كاريزما.