نضال الشافعي يهاجم استفتاء النقاد العرب
سادت حالة من الجدل على الوسط الفني بعد الاستفتاء على جوائز النقاد العرب، وحرص الفنان نضال الشافعي أن يعلق على ما أثير مؤخرًا.
وكتب نضال الشافعي على حسابه الشخصي بموقع التواصل الاجتماعي فيس بوك، معلقًا: "مع احترامي الكامل مين النقاد العرب أسمائهم إيه، هيئة تبع إيه، وكل الناس اللي فازوا واللي مافازوش، هما اتفرجو على ٣ مسلسلات دول، مقدروش يكملو عشان صلاة التراويح، رسالة الإمام ولا العربي بعافية، والكتيبة، وجعفر العمدة، أنا أتمنى من أي وزارة أو الدولة أو حتى هيئة الاعلام ، مافيش مهرجان او جوائز او لابد من موافقات ومتابعه وشفافيه".
وأضاف: "مش كل من هب ودب مبروك يا نجم احسن ممثل في الكون، اذا كان زمان جوائز لبان بم بم تحت اشراف وزارة الشئون الاجتماعيه وغطا ازازة البيبسي، لكن الفن المصري، كده اي حد عايز يجيب نجم يشهر جمعيته على قفاه او نجم يدفع ودول قله، ياجماعه ده بيقلل قيمة التقدير واحترام باقي الفنانين وتعبهم، مافيش حد في مارثون رمضان اللي بيسف التراب من اكبر نجم لاقل عامل وناس بتموت ، ويجي واحد معاه ٤ جنيه يقولك ده حلو ده وحش وعداد مضروب تصويت الجمهور وبيتغير في لحظه".
وتابع: "حاجه تضايق وتقلل القيمة وتقلل فكرة الفن والإبداع، يعني تخيلو الأوسكار ، دينزل واشنطن مكلف لجان تشتم في جاك نيكلسون ، عشان ياخدها منه..سخف اسف استاذ محمد كلامك استفزني وخلاني اتكلم وانا من ساعة ما بدءت حاطت لساني في بقي وساكت، ولا أقصد الإهانة لأحد واكن الاحترام لكل الناس بس دبلوماسيتي طرشأت".
واستكمل: "فكرة، ما نعمل كراتين جوايز زي كراتين رمضان ونوزعها على نجوم رمضان انهم الأفضل والاحسن بين خلق الله كلهم ، والمكان معروف في العتبه والاستنبات موجوده ، في الزجاج ب٢٥ جنيه ، والدرع بمية الدهب ٣٥ جنيها، الصفيحة النحاس بالعلبه القطيفه بـ٥٥ ، بفكر اشتغل فيهم مشروع حلو".
