أحمد حلمي: بحب المزيكا وبحب أسمع أم كلثوم من إعدادي

حل النجم أحمد حلمي، ضيفا على محطة راديو إنرجي 92.1، مع وائل منصور ومنة عامر في برنامج عيشها بإنرجي، مساء اليوم، بعد اختياره نجما لشهر مايو.

وكشف أحمد حلمي، عن حبه للموسيقى، موضحا: "في المزيكا أنا ليا رأي واضح وبعشق المزيكا والغناء وبحب أسمع أصوات وبسمع أم كلثوم من إعدادي، ولو رجعت بالزمن هقولك كان نفسي ألعب أي آلة خصوصا العود".

وأشار أحمد حلمي إلى أنه ضم مغنية معه في مسرحيته الجديدة "ميمو"، مفجرا مفاجأة عنها قائلا: "معانا في المسرحية بنت اسمها تغريد صوتها خرافي وعرفتها من تيك توك، الأسرة كلها بيغنوا وصوتها حلو بشكل رهيب وبعتنالها وعملت أغنية الفينال بتاعت المسرحية".

وكشف أحمد حلمي عن علاقته بالرسم القوية، وأحدث أعماله قائلا: "رسمت حلم حلمته بشكل خاتم معين كنت لابسه وهبعته لحد يعمله.. فيه لمحة فرعوني ومليان زي أحجار وكان في ضهره كان زي فضة مدببة".

وأعلن عن رغبته في تقديم معرض فني لرسوماته بفكرة معينة موضحا:" عاوز أرسم 100 لوحة من سم في سم حتى 100 متر في 100 متر.. ويبقى معرض فيه كل المقاسات وممكن ياخد سنة تنفيذ، الفكرة إنهم بيعملوا لوحة واحدة لو اتجمعوا مع بعض، وأدخل بيها مزاد فيه تبرعات وحاجة خيرية، وممكن يبقى ليها علاقة بنهاية العالم".