سارة نخلة: «مرضاش أكون زوجة تانية أو زوجي يتزوج عليا»
أشادت الفنانة سارة نخلة، باعتراف الفنانة ألفت إمام بأنها زوجة ثانية، وتعمدت إخفاء ذلك خوفًا على عائلة زوجها، مؤكدة: الزوجة التانية مش خطافة رجالة.
وقالت سارة نخلة خلال برنامجها “Face off” المذاع على شاشة “هي”: أول ما بنقول زوجة تانية يتقال عليها خطافة رجالة ولكن ده مش صح لأن رب العالمين قالنا ده مش حرام.
واستكملت سارة نخلة حديثها: ألفت إمام قالت قبلت أكون زوجة تانية ومأعلنتش ده خوفا على عائلته، وممكن تكون أخفته عشان الأسرة أو أطفاله أو لسبب هي شايفاه مقنع.. رب العالمين شرع ده وكل واحد حر ولكن طالما قررتي تكوني زوجة تانية استحملي ده.
وتابعت سارة نخلة: أنا ضد ده تمامًا لا أقبل أكون زوجة تانية ولا أن زوجي يتجوز عليا، ودي وجهة نظري وممكن تختلف مع غيري على حسب ظروف كل شخص، والزواج الثاني ده ممكن مراته تكون تعبانة ومريضة وطلبت منه يروح يتجوز.
واختتمت سارة نخلة حديثها: في رجالة ماشية تقولك حلال ربنا نتجوز الأربعة، وربنا بيقول برضه فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة، مش ماديًا فقط ولكن عاطفيًا واهتمام وكل حاجة ومشفتش رجالة خارقة بتعدل الحقيقة بين الزوجتين.
