بوسي لـ سعد الصغير: جنازة والدي متخصكش.. ومش هتعرف تضحك على الناس
عبرت الفنانة والمطربة بوسي، في تصريحات تليفزيونية عن استيائها بخروج خلافاتها مع والدها إلى العلن، مؤكدة أنها كانت تساعده باستمرار حتى قبل وفاته.
وقالت بوسي: مش محتاجة أظهر علاقتي بأبويا للناس، ولا أوري للناس بساعده وبسأل عليه ولا لأ دي علاقة أب بـ بنته، وفي وقت ما حصل مشاكل بينا، وزعلنا شوية، ولكن مش معنى كده إني هرميه، هو لازم إني استغل أبويا؟ ولكن في وقت من الأوقات مكنش فيه علاقة، لأني مريت بأزمة ومحدش وقف جنبي وأولهم أهلي، ومنين عايزني ابعتلك فلوس وأصرف عليك وأنا مش موجودة في القاهرة وعندي أزمة مالية، لما إنتوا متقفوش معايا في زنقتي مين اللي هيقف معايا؟
وتابعت بوسي: أبويا مكنش رجل أعمال ولا راجل مقتدر، ولكن متجيش عليا ومتجيش في وقت ما أنا مزنوقة وبمشي حالي بالعافية تقول دي مبتصرفش عليا، أنت شوفتها كده تمام ولكن متستغلش وتستغل أن الناس تطلع تتكلم عليا أو يحاربوني بيك.
وأضافت بوسي: وفي ناس استغلت والدي لمحاربتي، في ناس كتير راحوا له واستغلوه وحاربوني بيه، وكلمته بعد ما سعد الصغير راحله وكنت ببعت له فلوس وكنت هروح أزوره، بس عندي شغل وارتباطات ومعرفتش أروح، ومحدش قالي إنه مات، بعدها بيومين لقيت رسائل وتليفونات قالولي أبوكي تعيشي إنتي، وكان في الوقت ده كنت تعبانة وعندي نزلة معوية جامدة أوي رقدتني في السرير، وكان بيتعلق ليا محاليا ومباكلش، وبعدها بيومين كلمتهم قالولي أنهم عملوا الجنازة والعزاء، وسألت هل في حد ليه عنده فلوس؟ يعني هو مديون لأي حد؟ قالولي أبوكي زي الفل وإنتي كنتي لسه بعتاله فلوس.
وتابعت بوسي: ميخصش سعد الصغير روحت جنازة أبويا ولا لأ، مطلبتش منه يدخل، وأنا مبحبش حد يعمل تريند على قفايا، وهو نال جزاءه، ومش هتعرف تضحك على الناس وعارفة اللي بيستعرض واللي بيدعي الخير، واللي بيعمل خير مش محتاج يصوره، ليه بتدخل نفسك في حاجة متخصكش؟ هتقول زميلتك؟ أنا مطلبتش منك تدخل، وأنا مش عايزة حد يتدخل لأن ده أبويا.
