رضا البحراوي: «محمد عادل إمام صاحب فضل عليا ودعيت على فنان كبير»
كشف نجم الغناء الشعبي رضا البحراوي عن تفاصيل علاقته بالفنان محمد عادل إمام، حيث أشار إلى أنه صاحب فضل كبير عليه، وكشف أنه بعدما كان قد اتفق مع نجم كبير على الغناء في أحد المسلسلات، وجد أن هناك من تعاقد على الأغنية بدلًا منه.
وتابع رضا البحراوي خلال لقائه في برنامج صاحبة السعادة مع الفنانة إسعاد يونس: "ممكن أكون مخلص الغنوة وفرحان وحد تاني يجي يعرض فلوس وياخدها، حصلتلي مرتين ومنهم مسلسل ناجح أوي، وكنت اتفقت مع النجم الكبير اللي كان في العمل وبعدين وأنا في الطريق كلمني وقالي بلح، قولتله حسبي الله ونعم الوكيل ولفيت ورجعت، وقعدت بعدها سنة مفيش شغل".
وأضاف: "بعد موقف المسلسل لقيت مدير أعمال النجم محمد عادل إمام قالي الفنان عايز يقعد معاك، روحت قعدت معاه ووقتها كان في مسلسل هوجان ولقيته إداني تتر بداية ونهاية وسجدت على الأرض وحمدت ربنا، وقالي أنا مش هسيبك علشان أنت اتظلمت كتير".
واستكمل: "جالي مسلسلات كتير أوي، ولكن لازم أستأذن منه الأول وده حب وبيديني رأيه ويقولي ده أه وده لا، وهو كان حببني أوي من قبل ما أروح له، وتعاون معايا ووقف جمبي، وأنا من حبي بقيت أقوله أنا مش عايز حاجة منك من أدبك واحترامك وكفاية أنه نصرني قدام الناس وخلى ليا نفس، وهو صاحب فضل عليا".
