شقيق طبيب الساحل يكشف تفاصيل جديدة

كلفت النيابة العامة إحالة المتهمين الثلاثة الطبيب أحمد شحتة، والمحامية إيمان وثالث، بتهمة قتل طبيب الساحل الدكتور أسامة صبور عمدًا، لسرقة مبالغ مالية بحوزته، بعد دفنه حيًا داخل حفرة بعيادة المتهم الأول، وتحددت لهم جلسة 2 سبتمبر كأولى الجلسات.

أشرف صبور شقيق المجني عليه

واستدعت النيابة العامة أشرف صبور شقيق المجني عليه أسامة صبور طبيب الساحل، وجاءت أقواله في التحقيقات كالتالي:

في يوم 5 يونيو 2023، عرفت من صاحبه أحمد عبد الفتاح إن أسامة كان طالب منه يجيبله بدلة كلاسيك عشان عنده فرح حد بلدياته في نادي الفروسية في مدينة نصر، وعايز يحضره وإن أحمد عبد الفتاح راحله الشغل في مستشفى معهد ناصر ومالقهوش هناك في المعهد وفضل يرن على تليفونه مبيجمعش وبيديله مغلق، ولما سأل زمايله الدكاترة اللى شغالين معاه في المستشفى قالوا له إن أسامة آخر مرة شافوه كان يوم 4 يونيو حوالي الساعة 7 أو 8 بليل واستأذن بعدها وقال هيروح مشوار وييجي ومرجعش من ساعتها ولما حاولو يكلموه ويتواصلوا معاه كان تليفونه مقفول.

تفاصيل التحقيق في مقتل طبيب الساحل

وأشار شقيق طبيب الساحل في التحقيقات: لما عرفت الكلام ده تواصلت مع خالي السيد وقلت له على اللي حصل، فراح مع أحمد عبد الفتاح صاحب أسامة على قسم ههيا وعملوا محضر تغيب لأسامة وابتدوا يعملوا تحريات بالاشتراك مع قطاع شمال القاهرة، ومباحث قسم الساحل التابع ليه معهد ناصر لحد ما قدروا يوصلوا إن أسامة آخر مكان لتليفونه كان في حتة اسمها أبو وافية، ولقوا إن المكان ده تليفون زميله أحمد شحتة اللي معاه في المعهد كان موجود فيه برضو، وإن أسامة آخر مكالمة تليفون جاتله كانت من واحدة ست وصلوا بعد كدة وعرفوا إنها محامية وعلى علاقة بأحمد شحتة.

فحص الكاميرات في محل الجريمة

وأوضح لما فحصوا الكاميرات اللي حوالين المكان ده شافوا أحمد شحتة ومعاه شاب تاني ماشيين في الشارع بكرسي متحرك وحاطين عليه أخويا، وهما ملبسينه جلابية ونضارة شمس ومغمى عليه، وماشيين بيه رايحين عيادة أحمد شحتة اللي في منطقة اسمها الخلفاوي، ولما المباحث راحت عيادة أحمد شحتة خدوا بالهم إن فيه رتش مرمي في البلكونة وإن فيه ريحة جثة متعفنة في العيادة وبعدها بلغوا النيابة، والنيابة نزلت وحفرت في العيادة وطلعوا جثة أسامة والمباحث بعتوا للنيابة العامة وضبطوا احمد شحتة والشاب اللي كان معاه والمحامية، واعترفوا بكل حاجة وإنهم كانوا مخططين يخطفوا أسامة ويسرقوه بالعافية ويقتلوه بعد كده، عشان محدش يعرف أي حاجة عن اللي عملوه وهي دي كل معلوماتي عن الواقعة.

جلسة محاكمة المتهمين بقتل طبيب الساحل

وحددت محكمة الاستئناف بالقاهرة يوم 2 سبتمبر المقبل؛ لنظر أولى جلسات محاكمة المتهمين في قضية مقتل طبيب الساحل أمام جنايات الدائرة الأولى برئاسة المستشار عبد الغفار جاد الله.

وأمرت النيابة العامة بإحالة أحمد شحتة طبيب بشري، وامرأة تربطه بها علاقة زواج عرفي تدعى إيمان، وأحمد فرج مشرف إداري يعمل بعيادته، إلى محكمة الجنايات بعدما انتهت تحقيقاتها معهم إلى ثبوت اتهامهم بجناية قتل طبيب بشري عمدا مع سبق الإصرار المقترنة بجنايات خطفه بالتحايل، وسرقته بالإكراه، واحتجازه دون وجه حق، وتعذيبه بدنيا قبل القتل؛ لرغبتهم في الاستيلاء على أمواله، بعدما أوعز إليهم الطبيب المتهم بذلك لمعرفته بالمجني عليه وعلمه بثرائه.

أقوال المتهمين في مقتل طيب الساحل

وجاءت أقوال استشاري العظام كالتالي: اسمي رائد عبد المنعم 42 سنة، وأعمل طبيبا استشاريا لجراحة العظام بمستشفى معهد ناصر من شهر يونيو 2022، وكان من ضمن طاقم العمل بتاعي في المعهد الطبيب المقيم أسامة صبور طبيب الساحل، اللي اتقتل وكان من ضمن الطاقم بتاعي برضه في فترة من الفترات الطبيب المقيم أحمد شحتة، المتهم الأول في قضية مقتل طبيب الساحل.

وأشار إلى أنه في يوم 3 يونيو 2023: "ذهبت إلى معهد ناصر عشان أباشر شغلي ولستة العمليات اللي عندى، وكان معايا الطاقم الطبي بتاعي اللي من ضمنهم أسامة صبور، وفي اليوم ده جالي مكالمة على تليفوني من واحدة ست عرفتني بنفسها على إن اسمها مارينا غطاس على ما افتكر، وقالتلي إن والدتها عملت عملية شرايح ومسامير عندي من حوالي سنة، وإن والدتها وقعت على رجليها ومحتاجة حد يبص عليها في البيت لإن سنها كبير ووزنها تقيل، ومش هتقدر تتنقل المعهد وعايزة كشف منزلي فرديت عليها وقولتلها أنا مش بطلع كشوفات منزلية، بس هشوفلها حد من النواب لو فاضي يطلع، وقولتلها إن عامة لستت العمليات النهاردة طويلة ومش هينفع حد يطلع الكشف النهاردة وقولتلها أبقى اتصلي بيا على آخر اليوم عشان أقولك على النايب اللي هيطلع، وفي آخر اليوم فعلا على الساعة واحدة صباحا الست دى رجعت اتصلت بيا فرديت عليها وكان جنبي في الوقت ده الطبيب المقيم أسامة صبور، وقولتلها خدي الدكتور أسامة معاكي على التليفون عشان هو اللي متاح يجيلك البيت.

وواصل بعدها دكتور أسامة صبور طبيب الساحل، كلمها من خلال تليفوني وتواصل معاها عشان يرتب الزيارة المنزلية لوالدتها في مساء اليوم التالي، ومن بعدها أنا معرفتش أي حاجة من دكتور أسامة لحد ما روحت يوم 10 يونيو 2023، وسمعت من زمايله إنه متغيب من يوم 4 في الشهر، ويوم 14 عرفت من الصفحة الرسمية لمعهد ناصر إن أسامة اتقتل ويوم 18 عرفت من الصفحة الرسمية للنيابة العامة إن اللي قتل أسامة زميله أحمد شحتة الطبيب المقيم في قسم العظام بمعهد ناصر عشان يسرقه وبعد كده دفنه في عيادته وردم عليه التراب وكان مشترك معاه واحدة محامية وواحد تاني.