أنغام: «أقسى موقف في حياتي وفاة أختي غنوة»
تحدثت صوت مصر أنغام عن أصعب اللحظات التي مرت في حياتها، وهي وفاة شقيقتها الصغرى غنوة، حيث قالت: "الموقف كان قاسي جدًا، ومكنتش عايزة أصدق خالص لحد ما أنا غسلتها بإيدي وكنت عايزة أصحيها".
وأضافت أنغام خلال لقاء لها مع أنس بوخش في برنامجه ABtalks: "على الرغم من إننا مكناش على علاقة كويسة ببعض، لكن مكنتش أتخيل دا يحصل، مش بحب أدافع عن نفسي، ومش بحب أتكلم عن حد مش موجود، بس اللي أقدر أقوله بمنتهى الأمانة، عمري ما كنت سبب إن غنوة تزعل مني، أو يحصل بينا أي مشكلة".
واستكملت: "دي كانت بنتي مش أختي، الفرق بينا أكثر من 16 سنة، لو عمرها طال شوية كان ممكن الأمور تتغير، وممكن كانت عذرتني ولكن ربنا أراد كدا، هي معرفتش تعذرني وهي كمان معذورة الله يرحمها، لأنها ملقتش اللي يحنن قلبها".
ووجهت أنغام رسالة إلى شقيقتها غنوة، حيث قالت: "وحشتيني جدا، وحشتني غنوة بنتي الصغيرة، مش غنوة اللي كانت زعلانة وغضبانة، وحشتني البنوتة اللي كنت بسرح ليها شعرها وأخدها في حضني، وأقولها إن ياسين أحلى حاجة انت سبتيها ليا في الدنيا، ولد جميل وزكي وشاطر، وحبوب جدا".
