محمد فراج يرد على هجوم الجمهور: «ياريت الحكم يكون بنظرة شاملة مش من سطرين متاخدين على فيس بوك»
رد الفنان محمد فراج على الهجوم الذي تعرض له مؤخرًا بعد دفاعه عن الفنانة داليا شوقي شقيقة زوجته بعدما تعرضت للكثير من الانتقادات بسبب مشاهدها في مسلسل سفاح الجيزة.
وكتب محمد فراج على حسابه الشخصي بموقع الصور الشهير إنستجرام: "بعد مساء الفل، فوجئت بعدد كبير من أصدقائي بيقولولي مزعل الجمهور ليه يا فراج؟، بصراحة استغربت من السؤال، أنا بقالي أكتر من 15 سنة ممثل، عمر ما حصل إن اتقال لي جملة زي دي".
وأضاف: "القصة باختصار أنا كنت في العرض الخاص لفيلمي واتسألت من برنامج محترم عن ردي على إشاعة انفصالي عن بسنت وانتقاد أداء داليا، ورغم إن لا الوقت ولا المكان يستحملوا الكلام ده، لأننا بنحتفل بالفيلم، لكن احترامًا للإعلام بشكل عام جاوبت، بس زي ما كلكم عارفين إن صيغة السؤال بتتحذف من المونتاج والخبر اللي بيتنشر هو الإجابة فقط لاغير، فالسؤال كان: إيه ردي على حملات الإهانة والتجريح فأنا قولت إن ده مينفعش ناخده بجدية لكن مكنتش بتكلم على الجمهور بشكل عام إطلاقًا".
وتابع: "أنا متأكد إن جمهوري اللي بنى اسم محمد فراج فاهم معنى كلامي كويس وعارف إن في فرق بين وجهة النظر وبين الإهانة والتجريح، ومتأكد إن جمهوري عارف إني مستحيل أحجر على رأيه، وياريت دايما الحكم على أي موقف أو رأي يكون بنظرة شاملة، مش من خلال سطرين متاخدين من مانشيت على فيس بوك، أو من فيديو اتعمل له مونتاج".
واستكمل: "معلش طولت عليكم بس يمكن اللي حصل ده كان فرصة لتأكيد امتناني الدائم بآراء الجمهور وإني بستفيد من النقد والملاحظات زي ما ببقى سعيد بالإشادات، بحبكم وشكرا لدعمكم ليا من بداية مشواري".
