شروق في دعوى خلع: «جسمي باظ من جلسات الكهرباء»
بعد 7 سنوات من اللامبالاة عاشتها "شروق" مع زوجها بسبب تعاطيه المخدرات التى حولت حياتهما لخلافات ومشكلات بشكل دائم؛ فى كل مرة كانت تنوى الزوجة على الانفصال تضع أولادها أمامها وتحاول إعطاءه فرصة أخرى، ولكن كل الفرص باءت بالفشل وانتهى بها الحال فى محكمة الأسرة ورفع دعوى خلع.
حياة تعيسة عانت منها "شروق" طوال الـ 7 سنوات وهى على أمل إصلاح حال زوجها، ولكنها مخطئة لأن الأمور تفلتت من يديها وأصبحت لا تطيق العيش معه يوم واحد فقط بعدما أدركت أنها فى خطر هى وأولادها بسبب الزوج الذى لا يلتفت لمصلحة زوجته وأولاده.
تروى الزوجة قصتها قائلة: "كان بيشتغل فى شركة محترمة وطول فترة الخطوبة وأنا مشوفتش منه حاجة وحشة، بس من أول الجواز وأنا شفت وش غير اللى أنا أعرفه خالص على طول ضرب وقلة أدب فيا أنا والعيال من غير سبب عشان المخدرات اللى لحست دماغه دى".
وأضافت: "مشاكل كتير حصلت وأهلى تدخلوا وكل مرة أمى كانت بتقول لى ارجعى عشان خاطر عيالك، وأنا بسمع كلامها وأقول البيت والعيال، بس هو مبيتغيرش برضه ولسه زى ماهو بالعكس بيزيد فى ضربه ليا ووصل بيه الحال إنه يضربنى بأى حاجة قدامه وبيعملى جلسات كهرباء من خلال السلك العريان".
تغاضت "شروق" عن كافة المشكلات التى حدثت بسبب إدمان الزوج على أمل توقفه عن الإدمان، ولكنه كان لا يحدث شيء سوى ضربها وإهانتها طوال الوقت أمام الأطفال، استكملت الزوجة: "مكنتش بكبر المواضيع عشان خاطر العيال، بس بقى يمسينى بعلقة ويصبحنى بعلقة، وآخر مرة دى ضربنى وكهربنى وطردنى برا الشقة وقال لى أنا مش عايز أشوف وشك تانى إنتى والعيال".
أختتمت الزوجة: "خدت العيال ومشيت عند أهلى وطلبت منه الطلاق بس رفض، وأنا مقدرتش أرجع تانى بسبب اللى عامله فيا من أول الجواز، وجسمى اللى كله معلم من ضربه ليا، أمى كانت عايزة ترجعنى زى كل مرة بس أنا خلاص مش مستحملة معاه يوم واحد تانى".
وتوجهت الزوجة لمحكمة الأسرة بالتجمع الخامس ورفعت دعوى خلع بعدما فاض بها الكيل مع زوج يهينها ويضربها ضرب مبرح لمدة 7 سنوات كاملة، ولا تزال القضية منظورة فى المحكمة حتى الآن.
