عمرو سلامة: «محذفتش أي لقطة للراحل مصطفى درويش في شماريخ تكريمًا ليه»
كشف المخرج عمرو سلامة عن كواليس علاقته بالفنان الراحل مصطفى درويش، والذي كان قد رحل عن عالمنا قبل استكمال تصوير جميع مشاهده في فيلم شماريخ.
وقال عمرو سلامة في حواره مع الإعلامية منى الشاذلي ببرنامجها "معكم" إن الراحل مصطفى درويش كان قد كتب تعليق على أحد منشوراته على فيس بوك قبل وفاته بساعتين، لذلك عندما علم بخبر وفاته لم يصدق الأمر في البداية، إذ قال: "الموضوع كان مربك جدًا".
وتابع: "اتعرفنا على بعض للمرة الأولى في فيلم شماريخ، هو اترشح للفيلم من الفنان آسر ياسين، ولما دخلنا التصوير كان عاجبني أوي الكيميا بين آسر ومصطفى، ولما اتوفى فضلت حوالي أسبوعين على بدأت أفكر هعمل ايه في الفيلم لأنه مات قبل ما يخلص تصوير دوره".
وأضاف: "علشان أحل مشكلة غيابه في الفيلم غيرت في كتابة بعض المشاهد، وكان هناك مشاهد ما اتصورتش وعاملة أزمة كبير في الفيلم فحليناها عن طريق المونتاج".
واستكمل: "عشان أحل المشكلة بسهولة كان ممكن أحذف مشاهد مصطفى درويش، بس أنا مرضتش أشيل أي لقطة هو فيها، عشان يفضل أكتر وقت على الشاشة تكريمًا ليه، وفاته كانت مرعبة تهزك جامد جدا، خاصة إن مصطفى صغير في السن، قدي أنا وآسر تقريبا، وكمية المفاجآت اللي عرفناها بعد وفاته كانت رهيبة مفيش حد اتفاجئنا بكمية الخير اللي عمله قد مصطفى، كان محافظ على الجانب ده ومبيتكلمش عليه".
