كمال أبورية لبوابة مصر 2030: كنت بسمع إن محمد سامي بيهتم بمراته في أي عمل وطلع الكلام حقيقي

تحدث الفنان كمال أبو رية لبوابة مصر 2030، عن كواليس العمل في مسلسل «نعمة الأفوكاتو»، وحقيقة اهتمام المخرج محمد سامي بزوجته الفنانة مي عمر أكثر باقي الفنانين.

وقال كمال أبو رية في تصريحه: «قبل العمل مع محمد سامي كنت بسمع إنه بيهتم بزوجته في العمل، ولقيت إن فعلًا الكلام صح، وفي الحقيقة أنا مستغرب رد فعل الناس، ما الطبيعي إن الواحد يهتم بمراته طبعًا، مش فاهم فين العيب في ده، وخاصة إنها بطلة العمل، فكان لازم يهتم بيها، لأن لو سقط نجم العمل سقط العمل بالكامل».

وتابع: «بس في الحقيقي هو كمان كان بيهتم بالجميع أيضًا، لإن ده شغله وعايزه ينحج، ومي عمر حد شاطر ومجتهد، وأنا بعتبرها بنتي فعلًا، وكنت بتعامل معها كأنها بنتي، وقبل التصوير كنت أقولها مي استشعري إني أبوكي، وده كان السبب في نجاح العمل».

وأضاف: «كنت قبل التصوير سمعت إن العمل مع محمد سامي مش لطيف، بس بعد التعامل معه، وضح لي الأمر، هو شخص بيحب شغله جدا وهو محترم ومجتهد».

وعرض مسلسل «نعمة الأفوكاتو»، في النصف الأول من رمضان، وشارك في البطولة كل من مي عمر، أحمد زاهر، أروى جودة، كمال أبو ريه، عماد زيادة، ياسر علي ماهر، ولاء الشريف، أحمد ماجد، محمد الدسوقي، طارق النهري، سامي مغاوري، لبنى ونس، غادة فلفل، سلوى عثمان، هدير عبدالناصر، والعمل من تأليف محمد سامي ومهاب طارق، ومن إخراج محمد سامي، وإنتاج مها سليم.