مصطفى أبو سريع يكشف سبب رفضه المشاركة في ”مسرح مصر”

كشف الفنان مصطفى أبو سريع، سبب رفضه المشاركة في الموسم الثاني من "مسرح مصر" رغم حاجته المالية وقتها.

وتحدث مصطفى أبو سريع، عن كواليس ما حدث خلال لقائه في برنامج "أسرار النجوم" مع إنجي علي، قائلا:"أنا كنت بعمل مسرحية في مسرح الدولة اسمها "رجل بلا أجندة"، أستاذ أشرف كان صديق ليا وبيدعمني، حصل أن تجربة "مسرح مصر" هتروح mbc مصر، وحصل حاجات مش لطيفة أن في ناس من التجربة خانوا التجربة وبدأوا يطلبوا ياخدوا فلوس أكتر، كان أستاذ أشرف عايز يدعم الصفوف لأنه متسامح لدرجة أن مش هيلوم حد لو مشي، وطلع ليا عربون وأنا في جيبي مفيش فلوس، لكن قلت له مش هقدر، قالي ليه يا ابني إنت غبي؟ قلت له هي تجربتهم ونجحوا فيها ومش هينفع أنا أبقى عنصر زيادة فيها".

وتابع مصطفى أبو سريع: "أنا كنت شايف أنها تجربة ناجحة أنا مبدأتش نجاحها أنا هبقى دخيل نجاح، أنا روحت اتفرجت وحاببهم سوا".

وأكمل مصطفى أبو سريع: "أنا بحترم أستاذ أشرف عبد الباقي بشكل خاص وبحترم تجربته ومشواره ومن الناس لما اشتغلت معاه في "راجل وست ستات" كانت تعتبر من الحلقات اللي أول مرة أخد مساحة، من غير أفورة أنا سجدت في اللوكيشن بعد ما خلصت تصوير، لما لقيت نجم زي أشرف عبد الباقي عايز كل اللي حواليه حلوين أوي وبيفكر معايا وممكن أقوله إفيه يعجبه ويقولي إفيه أقوله".

وأكمل مصطفى أبو سريع: "تجربة مسرح مصر، أنا بحترم كل الأستاذة ورأيهم فيها، لكن بلاش نقول دا مسرح ومش مسرح طالما فيه جمهور وفي خشبة مسرح وناس رايحه تنبسط يبقى مسرح، شكرا لأشرف عبد الباقي عمل مسرح في وقت مكنش فيه ورجع الجمهور وطلع فنانين كلهم حبايبي وأصدقائي".