النيابة تخلى سبيل إمام عاشور فى واقعة مشاجرة الشيخ زايد

أمرت نيابة الشيخ زايد، بإخلاء سبيل إمام عاشور لاعب النادي الأهلي بعد سماع أقواله فى اتهامه بالتعدي على فرد الأمن بالضرب وافقده الوعي، بكفالة ٥ آلاف جنيه.

وكان فى وقت سابق، قال عبد الله مصطفى فرد الأمن المعتدى عليه من إمام عاشور لاعب النادي الأهلي: "أؤدي عملي زي أي إنسان طبيعي في مجال عمله، يوم الأربعاء الساعة 7 إلا الربع صباحًا واقف في مكان عملي تفاجأنا بنجم مصر إمام عاشور دخل علينا بسرعة فائقة وكان في حالة ثورة فأعطيت إشارة بعدم اعتراضه لتجنب أي مشاكل".

وذكر المجني عليه؛ طالبت من الكابتن إمام عاشور نفهم الموضوع فلقيته لف مرة واحدة وبدأ يشتم ويعلي صوته ويطلق ألفاظًا بذيئة، ولقيته مندفع علي وبيمسكني من الجاكيت والقميص علشان أنا المشرف والمسؤول عن الأمن.

وأوضح فرد الأمن المجني عليه بأن إمام عاشور إدعى تعرض زوجته للمعاكسة أثناء خروجها من السينما الساعة 5 الصبح، وقال لنا يا ولاد تييت أنا مراتي اتعاكست، قلت له مراتك اتعاكست احنا مالنا كأفراد أمن.. وليه لم تقدم شكوى عشان نعرف نجيب حقها، ومفيش حد قدم أي شكاوى عن معاكسة في التوقيت ده.

واستطرد في حديثه؛ "زوجة إمام عاشور ادعت بأنه تمت معاكستها في حفلة سينما الساعة 3 إلا ربع الفجر ليه ما بلغتناش وهي كانت معاها كتيبة شباب على كلامها إخواتها وإخواته، وما اتخانقوش وما اتحمقوش ليه وما وصلتيش للأمن ليه علشان الأمن يجيب لك حقك".

وقال المجني عليه: "لاعب النادي الأهلي مسك القميص والجاكيت ولقيت الضرب اشتغل فيا من كذا حد وزمايلي متدخلوش لإننا مش هنتخانق ولا هنعملها معركة وأنا أغمى عليا بعد لما اتضربت من الحاشية اللي تبع إمام عاشور"، مشيرا إلى أنه" كان الأفضل يتخانق مع اللي كانوا مع مراته وسبوها تتعاكس".

وأشار إلى أنه يواصل الإجراءات القانونية للحصول على حقه بالقانون ولن يفعل مثل ما فعل إمام عاشور، مشيرا إلى أنه قام بتحرير محضر يوم 20 يونيو بالواقعة الخاصة باعتداء إمام عاشور عليه، وتابع: "بقيت 12 ساعة في قسم الشرطة لعمل الإجراءات، وتم التحقيق معنا في النيابة وتم سماع شهود العيان، ولا صحة أننا تصالحنا".

واختتم حديثه قائلا: "انا جوا المول مسمعتش بوقوع أي مشكلة خاصة بإن زوجة إمام عاشور تعرضت للتحرش أو المعاكسة وبعد مراجعة الكاميرات تبين إن مفيش أي معاكسة".