عبد الحليم علي: أداء الزمالك ”يحرق الدم”.. ولا مبالاة داخل الملعب!
أعرب عبد الحليم علي، نجم نادي الزمالك الأسبق، عن استيائه الشديد من أداء لاعبي الفريق، عقب التعادل السلبي أمام المصري البورسعيدي، في المباراة التي جمعت الفريقين على ملعب برج العرب، ضمن منافسات الجولة الثالثة من مرحلة الحسم في الدوري المصري الممتاز.
وقال عبد الحليم علي في تصريحات نارية عبر قناة "الزمالك":"هو إنت يا كابتن سيف ويا كابتن نصر مش شايفين وقاريين الملعب؟ إنتوا لعيبة كبيرة، ومفروض يكون ليكم دور وتأثير. نازلين تلعبوا بإيه؟ فين الروح فين الحماس اللا مبالاة دي لا تليق باسم الزمالك."
وأضاف :"كل شوية بنتكلم في أرقام وأسماء، لكن مفيش أي مردود في الملعب. إنت لابس تيشرت الزمالك، لازم تبص للجمهور وتحترم الشعار اللي لابسه الجماهير بتيجي الإستاد عشان تشوف رجالة، عشان تحلم بدوري الأبطال وكأس العالم للأندية، مش عشان تطلع من الماتش مكسورة."
وتابع عبد الحليم :"إنت كمدير فني مش عارف تقرأ الملعب؟ بيسيرو زيه زي أي حد بيتفرج، مفيش تغييرات مؤثرة، مفيش فكر هجومي. النهاردة خسرنا نقطتين مهمين في سباق محتدم على مركز مؤهل لإفريقيا، ومع ذلك مفيش أي رد فعل."
واختتم حديثه :"المرحلة اللي جاية لا تحتمل التهاون. كل نقطة ممكن تفرق في مشوار التأهل والمنافسة الزمالك مش فريق عادي، وعلشان كده لازم اللاعبين والمدرب يعرفوا إن القميص ده تقيل، ولازم يتلبس برجولة."
