زيزو: الأجانب بياخدوا 1.5 مليون دولار.. وأنا اتشوهت علشان طالبت بحقي!
كشف أحمد سيد "زيزو"، نجم الزمالك السابق ولاعب الأهلي الحالي، عن تفاصيل صادمة في كواليس مفاوضاته الأخيرة مع نادي الزمالك، مؤكدًا أن الإدارة أهملت فرصة حقيقية للاستفادة منه ماليًا، رغم تلقيه عروضًا ضخمة أبرزها من نادي الاتفاق السعودي.
وقال زيزو في تصريحاته لقناة "MBC مصر":"وصلنا لاتفاق مع نادي الاتفاق إنهم يبعثوا مندوب للتفاوض، وبالفعل الراجل وصل مصر وقعد يومين وأجل طيارته 3 مرات على أمل يقابل أي حد من الإدارة.. لكن محدش رضى يقابله. الراجل كان جاي بميعاد رسمي من النادي، وراجع تاني يوم، وخرج من مصر من غير ما حد يتكلم معاه!"
وأضاف: "أنا كنت فري، والعروض كانت جاية كتير، من ضمنها عرض بـ4 مليون دولار، وكان ممكن الزمالك يستفيد، لكن للأسف اللي حصل كان مجرد شو للناس. قضيت 8 شهور باسمي بيتشوه، وأنا لاعب ست سنين ما عملتش مشكلة واحدة."
وتابع زيزو مدافعًا عن والده بعد اتهامات بالسعي لمكاسب شخصية من التجديد:"والدي جابني الزمالك سنة 2019، وجددلي مرتين، ومخدش جنيه واحد. لما جه عرض الريان، قالي اقعد هنا واعمل اسم. للأسف في ناس بتتهم بدون دليل، عايزين يطلعوا راجل عمره 60 سنة إنه سمسار على ابنه علشان بس الأمور ما مشيتش في التفاوض."
وأشار زيزو إلى الفوارق الكبيرة بينه وبين اللاعبين الأجانب:"الأجانب بياخدوا مليون ونص دولار، وأنا أول مرة جددت كنت باخد 9 مليون جنيه. عمري ما طلبت رقم خيالي، لكن الطبيعي ألاعب بنفس التقدير."
واختتم زيزو تصريحاته قائلاً:"كان في عروض وفرص حقيقية، لكن للأسف تم التعامل معها بعدم احترافية. كنت مستعد أدي للنادي فرصة يستفيد مني، بس محدش كان جاد."
