إبراهيم سعيد يكشف تفاصيل سجنه ويبكي على الهواء: ”بناتي سجنوني وشهدوا عليّا زورًا”

ظهر إبراهيم سعيد، نجم الأهلي والزمالك ومنتخب مصر الأسبق، في مقطع فيديو مؤثر، تحدث خلاله عن معاناته الأخيرة بعد قضائه عقوبة بالحبس لمدة 4 أشهر على خلفية قضايا نفقة لابنتيه، بمبلغ مليون و100 ألف جنيه، بموجب 4 أحكام قضائية.

وقال إبراهيم سعيد، باكيًا:"أنا في ابتلاء.. بس سؤال لدار الإفتاء: إزاي أتعامل مع بناتي اللي حبسوني؟ بناتي جوليا ولي لي عندهم 20 و21 سنة.. اللي من دمي حبسوني! ده أنا اللي مطلع لهم البطاقة.. شهدوا ضدي في المحكمة".

وأكد اللاعب الأسبق أنه لم يبخل على بناته بشيء طوال حياته، مضيفًا:

"أنا سايب لهم فيلا وعربية وأحسن لبس وأحلى برندات ومدارس، وأي حاجة كانوا بيطلبوها كنت بعملها، وفي الآخر دفنوني 4 شهور في السجن بتحريض من والدتهم".

وتابع إبراهيم سعيد:"أنا مقهور، ربنا ما يكتبها على حد، بناتي شهدوا ضدي شهادة زور وجابوا ناس يشهدوا زور بأني عندي 7 فيلات وبقبض 2 مليون جنيه في الشهر.. أنا لو معايا الفلوس دي هسجن نفسي ليه؟".

واستكمل باكيًا:"كانوا عايزيني أبيع شقة أمي وأرميها في الشارع علشان أخرج من السجن، بس رفضت.. قلت أتحبس ولا أرمي أمي.. مع إنها كانت مستعدة توافق علشان أخرج.. الظلم وحش، وربنا نصرني، بس أنا عايز حقي من اللي شهدوا زور ضدي".

واختتم حديثه برسالة مؤثرة:"أنا عمري ما أذيتهم، وكنت دايمًا بدعيلهم.. بس أنا مظلوم، وربنا كبير، وأنا مش هتنازل عن حقي".