لؤي وائل: اتظلمت في الأهلي بسبب ”أشخاص معينة”.. وتجربتي مع المارد الأحمر هي ”الأسوأ” في مسيرتي

قال لؤي وائل لاعب المقاولون العرب الحالي والأهلي والإنتاج الحربي والجونة السابق إنه لا يعرف أسباب فشل تجربته مع النادي الأهلي موسم 2014 – 2015، مؤكدًا أنه "اتظلم" بسبب أشياء كثيرة، وذلك عبر تصريحات هامة لبرنامج نجوم دوري نايل مع أحمد المصري والذي يذاع عبر إذاعة أون سبورت إف أم.

وتابع وائل: اتظلمت في تجربتي مع الأهلي، كنت حاسس إني استاهل ألعب وأخد فرص أكتر عشان أظهر بمستواي الحقيقي، ورغم كده عمري ما ندمت إني رجعت الأهلي بعد تجربة الاحتراف في ليرس البلجيكي، لأن النادي الأهلي هو بيتي اللي اتربيت وقعدت فيه 15 عامًا، ولو رجع بي الزمن هكرر نفس القرار ومش هفكر وهرجع فورًا، الأهلي بالنسبة لي في حتة تانية خالص.

وأكد لاعب المقاولون العرب الحالي: كنت بتمرن كويس جدًا وبتوعد إن هلعب ومبلعبش، أو ألعب في مكان غير مكاني وبالتالي بظهر بشكل وحش، وأوقات كتير لعبت وأنا مصاب، الموسم ده حرفيًا كان الأسوأ في مسيرتي الكروية، ولما اتصابت تاني قررت إني أمشي وأطلع ألعب في أي حتة تانية وساعتها جالي عرض الإنتاج الحربي مع كابتن شوقي غريب.

وأضاف لاعب الأهلي السابق: عملت موسم قوي مع الإنتاج الحربي مع كابتن شوقي غريب والنجوم اللي كانوا في الفريق ساعتها، وقدرنا ننافس لحد أخر ماتش على المركز الثالث، كان أحلى موسم لي في الدوري المصري والحمد لله مخسرناش ساعتها ولا ماتش على ملعبنا، بعدها كان فيه كلام إني أرجع الأهلي تاني وكان نفسي ده يحصل، ساعتها كنت هرجع الأهلي بعقلية مختلفة عن التجربة الأولى لكن الموضوع مكملش.

وواصل لؤي وائل: ظروف معينة وأشخاص معينة كانوا من أسباب عدم نجاح تجربتي مع الأهلي، تجربة اتعلمت منها كتير وفرقت معايا جدًا، أنا رجعت الأهلي عشان كابتن علاء عبد الصادق قاللي النادي محتاجك، وبالتالي مفكرتش ثانية في القرار ورجعت فورًا، كنت مبسوط ومتحمس إني رجعت ألعب للأهلي تاني، لكن للأسف الأمور مكانتش أفضل حاجة وقتها، جيل كامل اعتزل وجيل جديد بيتبني، تقريبًا الـ11 لاعب كانوا أول مرة يلعبوا مع بعض ومع مدرب جديد هو جاريدو، كانت سنة صعبة جدًا على النادي والجماهير، يمكن كانت أصعب سنة في تاريخ النادي رغم فوزنا بكأس مصر والكونفدرالية، مخدتش فرصتي كاملة والتعامل مع المدرب الإسباني مكانش أفضل حاجة.

واختتم لاعب الإنتاج الحربي السابق: اتفرمنا مش اتظلمنا في الموسم الصعب ده، حصل إصابات ومشاكل كتير، ورغم إني مخدتش فرصتي كاملة، رفضت أروح أكلم كابتن وائل جمعة مدير الكورة رغم إنه كان بيحفزني دايمًا وبيشجعني، لإني مؤمن إن شغلي هو اللي هيخليني ألعب مش الكلام، كنا في مرحلة انتقالية صعبة جدًا ربما تكون الأسوأ في تاريخ النادي الأهلي، الإدارة والجماهير عايزين كل حاجة بطولات ونتائج وأداء، وإحنا كمجموعة كل حاجة حوالينا والأجواء كانت صعبة جدًا وده ظلم المجموعة كلها مش حد بعينه.