شوبير غاضب من فتوح: «الزمالك أنقذك.. فرددت بخداع وهروب»
وجّه الإعلامي أحمد شوبير انتقادات لاذعة لتصرف أحمد فتوح، لاعب الزمالك، بعد مغادرته معسكر الفريق بدعوى ظرف عائلي، ثم ظهوره في حفل غنائي، ما تسبب في جدل واسع داخل النادي.
وقال شوبير عبر برنامجه الإذاعي صباح اليوم الأحد: "عندنا مثل بيقول: إللي اتلسع من الشوربة ينفخ في الزبادي، لكن فتوح شرب الشوربة وهي مولعة، الزمالك دعمه في أزمته السابقة وعاد وجهّزه بعد حادثه، ورغم إن الحادث قضاء وقدر، كان فيه ملابسات واضحة، والنادي وقتها وقف معاه".
وتابع موجّهًا حديثه للاعب: "الزمالك عمل معاك اللي مفيش بعده، وكان لازم ترد الجميل، مش تسيب المعسكر بحجة إن عمك تعبان وتظهر بعدها في حفلة غنائية! إنت لاعب محترف، وملك للنادي، ودي مش حرية شخصية، لو كنت عايز تروح الحفلة كان لازم تبلغ إدارة الزمالك وتاخد موافقة، ولو رفضوا، تبقى ملتزم بالمعسكر".
وأضاف: "ما ينفعش تكمل كده يا فتوح، إنت لاعب مهم وأساسي في الزمالك والمنتخب، ودي مش طريقة تحافظ بيها على مستقبلك، الكابتن حسن حمدي كان دايمًا بيقول لنا: استغلوا كونكم لاعيبة دلوقتي، وبعد الاعتزال اعملوا اللي عايزينه".
واختتم شوبير قائلًا: "رد فعل الزمالك هذه المرة كان مختلف، تغريم اللاعب ووقف مستحقاته قرار واقعي، مش مجرد إجراء على الورق، والمثل بيقول: اضرب المربوط يخاف السايب".
