شوبير: أحمد عبد القادر يتدرب ”بالغصب”.. ومحدش بيرد عليه
شنّ الإعلامي أحمد شوبير، حارس مرمى الأهلي ومنتخب مصر السابق، هجومًا حادًا على إدارة النادي الأهلي بسبب موقفها من اللاعب أحمد عبد القادر، مشيرًا إلى أنه مستبعد من التدريبات الجماعية بدون أسباب واضحة.
وقال شوبير، خلال تصريحات عبر برنامجه الإذاعي:"اللي بيتقال عن مشاركة عبد القادر في التدريبات الجماعية غير صحيح، محصلش، مفيش أي تدريب شارك فيه لحد دلوقتي. طب ليه؟ معرفش، هل من حقه يتدرب مع الفريق؟ آه طبعًا. ولو غاب يوم، يتخصم له".
وأضاف:"عبد القادر بيروح التدريب بالعافية، وبيشتغل لوحده في الجيم زي الموظف اللي بيمضي عشان ما يتخصمش له. ده لاعب محترف وليه عقد وبيقبض من الأهلي، بس لازم يتدرب مع الفريق الأول".
وأكد شوبير أن عبد القادر سيرحل عن الأهلي في الموسم المقبل، موضحًا:"الولد هيمشي من الأهلي السنة الجاية، ده مؤكد، والزمالك وبيراميدز بيتفاوضوا معاه، وده لاعب جيد جدًا، وسبق وخاض تجربة ناجحة في قطر".
وتساءل شوبير:"هو غلط في حد؟ قال حاجة ضد النادي أو الإدارة؟ الحقيقة لا. ماعملش حاجة. طب ليه مقعدينه؟ ولو طلع اتكلم ولا قال كلمتين هيزعلوا منه! ليه؟".
واختتم:"أنا عارف إن في ناس ممكن تزعل من الكلام ده، بس لازم أكون أمين. عبد القادر مظلوم، ومش لاقي سبب واحد يمنعه من المشاركة في التدريبات الجماعية، ومافيش شفافية في اللي بيحصل".
