الأهلي إلى أوروبا؟ ياسين منصور يطرح رؤية طموحة للنادي في المستقبل
أكد ياسين منصور، رجل الأعمال والمرشح على منصب نائب رئيس النادي الأهلي، أن قراره بالترشح في الانتخابات المقبلة جاء بعد تفكير طويل، لافتًا إلى أن الظروف الحالية أصبحت أكثر ملاءمة للانخراط في العمل العام داخل النادي، بعد سنوات من الانشغال في إدارة أعماله.
وفي تصريحات خاصة لقناة الشرق، قال منصور:"الفترة اللي فاتت كانت صعبة عليّ بسبب ضغط الشغل، وكنت شايف إن منصب نائب رئيس الأهلي محتاج تفرغ حقيقي، لكن دلوقتي ابني انضم لشغلي، وحاسس إن الوقت مناسب لخوض الانتخابات".
وأعرب عن احترامه الشديد للكابتن محمود الخطيب، المرشح على منصب الرئيس، مؤكدًا أنه دعم استمراره على رأس المجلس المقبل رغم ما أثير عن إمكانية ترشحه هو نفسه على هذا المنصب.
وقال:"كابتن الخطيب أسطورة كروية مصرية وأهلاوية، ورغم تعبه الحالي ونصيحة الأطباء له بالراحة، قلت له: أنا عاوزك تفضل رئيس.. مقدرش أجي من بره النادي وأبقى رئيس على طول، محتاج على الأقل من 3 لـ5 شهور أفهم كل التفاصيل من جوه".
وشدد منصور على أهمية تطوير الأداء الإداري داخل النادي الأهلي وفقًا للمعايير العالمية، مضيفًا:
"بحلم إن كل واحد في النادي، في أي إدارة أو قطاع، يكون عنده KPIs واضحة بيتحاسب عليها، ويكون فاهم دوره وإيه المطلوب منه بالظبط، لازم نتابع أحدث ما وصلت له الإدارة الرياضية في العالم ونطبقه هنا".
وفي تصريحات لافتة، أبدى ياسين منصور طموحًا كبيرًا لمستقبل الأهلي، مشيرًا إلى أنه يرى النادي أكبر من حدود القارة الإفريقية، وقال:"أنا شايف إن الأهلي لازم يلعب في أوروبا، في دوري الأبطال أو الدوري الأوروبي.. الأهلي براند رهيب في الشرق الأوسط، وأنا دايمًا بآمن بقوة البراندز، وولاد الأهلي دايمًا بيحطوا النادي فوق الكل، مش بيشوفوا المناصب أو الأدوار الشخصية".
واختتم حديثه بلمحة من ذكرياته كمشجع، قائلًا:"أنا بشجع الأهلي من وأنا عندي 4 سنين.. أنا إسكندراني، وكنت بروح ماتشات الأهلي لما بيلعب في الإسكندرية، واتضربنا كتير من جمهور الاتحاد، لكن فضل حبي للأهلي مستمر لحد النهاردة".
