عاجل| أول تعليق رسمي من إمام عاشور عن أزمته مع الأهلي

نشر الدولي إمام عاشور، لاعب الفريق الكروي الأول بالنادي الأهلي، رسالة مطوّلة عبر حسابه الرسمي على موقع التواصل الاجتماعي، يوضح فيها حقيقة ما تردد عن حالته الصحية وخلافاته المزعومة مع النادي وجماهيره.

وكتب إمام عبر حسابه على إنستجرام: "للأسف كلام كتير مغلوط وغير صحيح بيتردد بخصوص اللي حصل. وأنا متقبل أي قرار ياخده النادي. وواثق أنه المسؤولين في الأهلي هيتفهموا موقفي كويس.. أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي. وباخد مضادات حيوية".

وأكمل: "للأسف كل أسرتي بتعاني من نفس الأعراض.. وأنا بلغت الدكتور أحمد جاب الله بظروفي الصحية وعدم قدرتي على السفر. وده إجراء غير كافي في مثل هذه الأمور، لكن أخطأت بحسن نية وكان المفروض أواصل مع الكابتن وليد صلاح الدين علشان يبلغ المدير الفني وتعمل الإجراءات الطبية المتبعة عند التخلف عن السفر".

وواصل: "الموضوع اتقفل خلاص. وتواصلت امبارح بالليل مع الكابتن وليد صلاح الدين. وأنا تحت أمر النادي. وجمهور الأهلي سندي وظهري بعد ربنا سبحانه وتعالى. وبعتذر للنادي والجهاز الفني وزملائي وقبلم جمهور الأهلي. أنا فخور باللعب في أكبر نادي في أفريقيا. وعلاقتي بجماهيري العظيمة لا تقبل القسمة على اثنين.. وأرجو من الجميع إغلاق هذا الموضوع.. والناس اللي بتقول إن إمام عايز يلوي دراع النادي بيقولوا حسبى الله ونعم الوكيل.. محدش يقدر يلوي دراع الأهلي".

واختتم: "لا يمكن أفكر بالطريقة دي أبدًا.. وأنا اتشرفت بارتداء الفانلة الحمراء ويقالي 3 سنين في النادي. والحمد لله عمري ما قصرت لا في حق النادي ولا جماهيره. وده حقهم عليا. ووجودي في الأهلي نادي القرن وفي ظهري جمهور الأهلي بيعوضني عن كل حاجة.. عندنا ماتش بكرة مهم. يارب كل التوفيق لزملائي والجهاز الفني ونحقق الفوز اللي يسعد كل الأهلاوية".