«بعشق تراب البلد».. التعليق الأول من شريف إدريس بعد اعتزاله الفن
حرص الفنان شريف إدريس، أن يوضح لجمهوره عدد من النقاط الهامة وذلك بعدما أعلن أمس أنه قرر اعتزال الفن بشكل نهائي والسفر للخارج بسبب أنه لم يتلقى منذ فترة كبيرة أي عروض فنية جديدة، وأوضح أنه فكر في الإنتحار أكثر من مرة بسبب الأزمة المادية التي يمر بها.
وكتب على صفحته الرسمية عبر موقع التواصل الاجتماعي «فيس بوك» قائلًا: «معلش يا جماعه أنا بعتذر للجميع عن عدم ردي عالتليفون وأنا الحمد لله كويس وبخير بس فيه كام حاجه مهمه جدا عايز اوضحها الناس اللي بتقولي شيل البوست علشان ولادك أنا مش محرج ولا مكسوف من اللي كتبته واللي كتبته وحضراتكم مش قادرين تفهموه اني راجل بيحترم نفسه ومش قابل إهانه في شغلي اللي اتربيت فيه وولادي هيكبرو ويفهمو ده».
وأضاف: «أنا ماقولتش إني فكرت أقتل عيالي أنا قولت أن الضغوط اللي أنا فيها وصلتني إني بحلم بكوابيس أن بقتل عيالي وأظن كلكم بتحلمو بكوابي عيالي دول هما كل حاجه في حياتي لا يمكن أذيهم ولا أفكر أذيهم، أنا ماقولتش اعتزلت علشان أتوب، أتوب عن إيه مش فاهم أنا شاركت من وانا عيل صغير في اعمال محترمه الكل بيحبها وعمري ماشاركت في حاجه خليعة».
وتابع إدريس: «الناس اللي واخده البوست باستهزاء وتقليل وعدم احترام دول مايتردش عليهم اللي يستهزء في كرب بني أدم يبقي شخص عديم الإنسانيه، أيوه أنا بدور علي فرص سفر كويسه مش علشان بكره البلد أنا بعشق تراب البلد دي أكتر من أي حد».
وأوضح: «ناس كتير بعتتلي أن قناة الجزيره مشيره البوست بتاعي وصفحات الإخوان ودي مش مسؤليتي وكل الناس عارفين موقفي الواضح تمامًا ضد الإخوان وكل الناس عارفين انهم بيصطادو في الميه العكره والأهم أن أنا كل كلامي واضح وصريح ومالوش اي علاقه بالسياسه ولا اتهمت الدوله ولا قولت مؤامره ولا قولت اي حاجه أصلًا دي ارزاق والارزاق علي الله وانا راضي بقضاء الله وقدره الحمد لله».
واختتم شريف إدريس، حديثه قائلًا: «الحمد لله اني اخدت قراري وأنا واقف علي رجلي وبصحتي لأن فيه زملاء وصلو لمراحل صحيه صعبه ربنا معاهم ويشفيهم فانا مش هستني يجرالي حاجه وابقي راقد دعواتكم أنا الحمد لله كويس وبخير وأن شاء الله كله هيعدي من كان رزقه علي الله فلا يحزن تحياتي للجميع وشكراً ليكم ولمحبتكم».
