منة عرفة تكشف سر طلاقها ومحاولة انتحارها وحقيقة زواجها من علي ربيع

احتلت الفنانة منة عرفة قائمة محركات البحث، وذلك بعد ظهورها كضيفة في برنامج «سابع سما»، والمذاع عل قناة النهار، وكشفت خلال اللقاء عن سر طلاقها من محمود المهدي ومحاولتها الانتحار، وحقيقة زواجها من الفنان علي ربيع.

طلاق ومحاولة انتحار منة عرفة

قالت الفنانة الشابة منة عرفة إن طلاقها من محمود المهدي كان بقرار مشترك: «ده كان قرارنا إحنا الاتنين، الموضوع بنا مبقاش حب ورومانسية زي الأول، ففجأة الدنيا بقت فيها مشاكل كتير وأطراف بتتدخل وناس تتكلم والناس بقت عارفة كل حاجة واللي مش عارف حاجة عامل نفسه عارف وبردو بيتكلم الناس بتخش تحاكمني، وتقولي انتي موقفتيش مع جوزك انتي ليه ملتزمة الصمت طب اطلعي دافعي عنه حتى».

وأضافت: «مين قال إني موقفتش جمبه، ومين قال ان انا مدافعتش عنه ومقعدتش وحاولت أحل، ومين قال ان أنا ماسعتش علشان نشوف حلول، انتوا متعرفوش حاجة انتوا بتوصلوا الناس لتفكير مش حلو، ومحاولة للانتحار بسبب كلام الناس ده، وأنا مش مضطرة أطلع أبرر وأحكي للناس أنا وقفت أد ايه ولا عملت ايه، محدش بيحكي حاجة عملها علشان نفسك أو علشان جوزك أو علشان بيتك، الست الأصيلة اللي بتحترم نفسها وبيتها، بتعمل ده من غير ما تطلع تحكي وتقول أنا عملت وسويت».

وتابعت: «أنا زعلانة من نفسي شوية، لأني قصرت في حق نفسي كتير ولكن ملحوقة إن شاء الله، دي مرحلة صعبة عليا جداً، لأن مفيش حد يحب إنه يتعلق بحد، وبعدين الموضوع للأسف ميكملش مفيش حد يحب إن يحصله كده أكيد ورغم المشاكل الكتيرة اللي حصلت، ولكن في الآخر الواحد بيزعل وبيحزن على فراق الشخص نفسه، خاصة إن كان بينكم تفاصيل كتيرة.. علشان كده أنا زعلانة، وأنا بحبه جداً، وبكنله كل الحب والاحترام».

حقيقة زواج منة عرفة وعلي ربيع

كشفت منة عرفة أن موضوع زواجها من علي ربيع غير حقيقي بالمرة وأنها كانت معزومة على السحور منذ 4 سنوات وكان معهم على نفس الطاولة، قائلة: «هزر وقال لوالدتي أنا عايز أتجوز بنتك وكان يجلس معنا صحفي فاعتبر الموضوع حقيقي ونشره رغم أن الموقف هزار كله».