انفراد.. ننشر نص التحقيقات مع شريك «المحلل الشرعي» محمد الملاح

- شريك "الملاح": عملت صفحة محلل شرعي عشان أتجوز واحدة غنية

- الشريك: محمد الملاح قالي ظروفي صعبة وهشتغل محلل عشان الفلوس

- الشريك: مقابلتش الملاح ولا مرة وعملي بلوك لما اتشهر

واقعة غريبة من نوعها فجرها برنامج تلفزيوني، بعدما خرج "محمد الملاح" الذي أصبح معروفا بـ"المحلل الشرعي" على إحدى القنوات قائلًا إنه تزوج أكثر من 30 سيدة تطلقت من زوجها باعتباره محلل شرعي، كما أنشأ صفحة عبر مواقع التواصل الاجتماعي للإعلان عن ذلك ليثير حالة من الغضب بين المواطنين.

أيام مضت على الظهور التلفزيوني الأول لـ"الملاح" الذي أصبح حديث الشارع المصري بين ليلة وضحاها ما بين مستهزء بما يفعله المحلل الشرعي وآخر غاضب من فعلته ويصفها بأنها "حرام شرعا"، وعلى الجانب الآخر بدأت البلاغات تنهال على رأس "المحلل الشرعي" بعد تصريحاته المثيرة للجدل، ليبدأ في التراجع وإلقاء التهمة على معدي البرنامج الذي شهد ظهوره الأول.

أغروني بالشهرة وظروفي صعبة.. كانت تلك كلمات "محمد الملاح" للتملص من تصريحاته التلفزيونية، ويؤكد أن كل ما تفوه به هو كذب واداعاءات لا صحة لها، وأن تصريحاته كانت لمجرد الشهرة وتلقي الأموال الطائلة، ويبدت "المحلل الشرعي" رحلة جديدة ولكن في أروقة المحكمة لاتهامه بالتعدي على مبادئ وقيم المجتمع المصري وإنشاء وإدارة حساب على "فيس بوك" بهدف تسهيل جريمته بالاشتراك مع آخر.

وينفرد "بوابة مصر 2030" بنشر نص اعترافات "حلمي.ر"، المتهم بالاشتراك مع محمد الملاح المعروفة إعلاميا بـ"المحلل الشرعي" أمام جهات التحقيق، وإلى نص التحقيقات:

س: ما صلتك بالصفحة المسماة "محلل شرعي" لرد المطلقات لوجه الله؟

ج: أنا قمت بإنشاء الصفحة دي من قبل

س: وما هدفك من إنشاء تلك الصفحة ومن المسئول عنها؟

ج: أنا المسئول عن الصفحة وكان هدفي الوصول لجوازة مرتاحة من واحدة تكون ظروفها المادية كويسة وتسندني وتكون عايزة الستر ومكانش هدفي أشتغل محلل لأني عارف أن المحلل حرام وكذا مرة ناس تواصلوا معايا من خلال الصفحة عشان أشتغل كمحلل ولكن أنا كنت برفض وكنت مستني فرصة الزواج الشرعي الدائم اللي هيحسن ظروفي المادية.

س: ما صلتك بالمتهم محمد الملاح؟

ج: أنا اتعرفت عليه من خلال الصفحة بتاعت محلل شرعي وكانت علاقتنا اتصال تليفوني أو رسائل عبر الصفحة أو على حسابي على الفيس بوك، ومقابلتهوش ولا مرة وهو كان صديق ليا على "فيس بوك" ولكنه عملي بلوك بعد ظهوره في التلفزيون.

س: وكيف تحديدا تعرفت عليه؟

ج: هو بعتلي رسايل على الصفحة في البداية وكان عايز يشتغل محلل شرعي بأي شكل بغض النظر عن سن الزوجة وكان بيقولي إنه ممكن يتجوز مقابل أنه ياخد مبلغ مالي أو مقابل المتعة فقط.

س: وما هو ردك عليه؟

ج: كان ردي دايما أنه لما تيجي حاجة مناسبة هكلمك ولكن من جوايا مكنتش ناوي على كدة لأني عارف إن المحلل حرام ومكنتش عايز أشترك في الموضوع ده.

س: هل يوجد أشخاص آخرين تواصلوا معك لعرض خدماتهم؟

ج: أيوة كتير بس أنا معرفهمش غير من على رسائل الصفحة، ومديتش رقمي لحد غير خمس أشخاص تواصلوا معايا وكان منهم محمد الملاح.

س: ما هي ظروف وملابسات محادثتك مع المدعو ياسر التلاوي؟

ج: هو تواصل معي عبر صفحة المحلل الشرعي وحاول إقناعي بالظهور في برنامج تلفزيوني بمقابل مادي وقالي هتطلع مع الشيخ مبروك عطية وأنا رفضت بس هو حاول يقنعني وأنا بعت له رقم محمد الملاح لأنه كان دايما بيشتكي من احتياجه للمال فأنا قولت يطلع في الحلقة ويأخذ فلوس مادام هو محتاجها بعد ما استأذنته وهو وافق.

س: وما هو سبب رفضك؟

ج: علشان أنا مش محلل شرعي والاسم اللي مكتوب على الصفحة ملهوش علاقة بالحقيقة وعلشان خاطر بيتي ميتخربش وعلشان أصلا أنا مش عامل الصفحة دي عشان أشتغل محلل وكان الهدف منها أتجوز جوازة مرتاحة.

س: وما سبب اختيارك لمحمد الملاح بالذات؟

ج: لأنه دايما كان بيقولي ظروفي صعبة وأمي تعبانة ومحتاج شغل ومحتاج أي فلوس عشان أقدر أعيش وهو كان اكتر واحد بيتكلم عن استعداده أنه يشتغل محلل لأنه عمل كدة 3 مرات وعنده فكرة عن الموضوع.

س: وما هي ملابسات حصولك على موافقة محمد الملاح؟

ج: أنا اتصلت عليه وقلتله فيه صحفي عايزني أطلع معاه في برنامج لكنه لا يعرف إسمي أو شكلي ولا تليفوني فإذا كانت تمشي معاك الحلقة اتفق معاه أنت عشان أنا برا الموضوع ومحمد سألني هيدفع كام قلتله معرفش اتصل واتفق معاه وهو قالي أديله رقمي وخليه يتصل بيا وبالفعل تواصل معاه ومحمد بلغني برسالة على فيس بوك وقالي على ميعاد الحلقة ولكني متفقتش معاه يقول إيه في الحلقة.

س: وهل تم التواصل بينك وبين "الملاح" بعد إذاعة الحلقة بالتلفزيون؟

ج: فعلا تواصل معايا برسائل صوتية وكتابية على فيس بوك ماسنجر وقالي خليني أدمن الصفحة وأكون الواجهة الإعلامية وهنعمل فلوس كتير على السوشيال ميديا وأنا رفضت لأني كنت متوتر وكان بيجيلي رسايل فيها شتايم على الصفحة فاضطريت أقفلها وافتحها تاني.

س: ما قولك وقد أنكر الملاح صلته بصفحة "محلل شرعي"؟

ج: هو مكانش مسئول عن الصفحة هو كان متواصل معايا عبر الرسايل وأنا معرفش إن كان عمل صفحة خاصة بيه ولا لأ.