أحمد موسى عن مزاعم «بيع» مصر للقطاع الخاص: «طب نعمل إيه»
انفعل الإعلامي أحمد موسى على الهواء، بسبب ما قاله البعض بأن الدولة أرادت إشرك القطاع الخاص في المشاريع رغبة منها في ترك المسئولية وبيع مصر، كما زعم البعض.
وقال موسى، خلال برنامجه "على مسئوليتي"، المذاع على قناة صدى البلد: "كنا كل شوية نلاقي خبر هي الحكومة بتزاحم القطاع الخاص ليه، طب ادوا فرصة ليه، مكنوا القطاع الخاص من العمل".
وأضاف موسى: "عندما قرر رئيس الجمهورية، وقال إحنا محتاجين القطاع الخاص، والحكومة هتسيب شركات عشان القطاع الخاص يدخل، فنلاقي اللي بيقول اه هتبيعوا البلد، هتبيعوا مصر خلاص، بتسيبوا الأصول عشان تبيعوها".
وأكمل موسى: "طب نعمل إجراء يقولوا بيعتوا مصر، ميعملوش يقولوا كوشوا على كل حاجة، حضرتك أقفل الباب ولا أفتحه، تشغل القطاع الخاص ولا متشغلوش".
وواصل: "الناس هما هما متغيروش، اللي بيقولوا إن الشركات واخدة كل حاجة، طالعين يقولوا بتبيعوا مصر وبتخربوها، هي البلد بتتخرب لما نقول للقطاع الخاص يشتغل؟، الحكومة تستهدف من هذا الأمر المواطن، وتريد زيادة الاستثمارات، ورفع معدلاتها".
