رحيل ذكري عن الشقنقيري: «اللي تحسبه موسى يطلع فرعون»

عادت الموديل رحيل ذكري لمهاجمة الفنان محمد الشقنقيري، وذلك في فيديو جديد، حيث كانت قد أعلنت عن انفصالها عنه وهو ما نفاه الفنان، وكتبت رحيل على حسابها الشخصي على موقع الصور الشهير «إنستجرام» معلقة: «طبعا أنا لسه حاطة لكم صورة، كانت سيشن قديم، ظهرت فيه، وكان فيه إيد كاتمة بوقي، وهو ده ردي عليه، بقول له مهما عملت محضر، لو مليون محضر أنا بالنسبة لي مش طار أنا مش عاوزة حقي.. كنت عاوزة راجل، وأنت ما طلعتش راجل».

وتابعت: «لازم تعرفوا يا جماعة، بالعقل والمنطق، حاولوا تشغلوا دماغكم، وبلاش أسلوب أن الأغلبية ترمي الاتهامات، والكلام مش محمد الشقنقيري اللي أطلع بيه تريند، أنا اللي طلعته تريند، مين كان بيسمع عنه غير بعد ظهوره معايا؟، لو عاوزة شهرة هجيبه هو ليه اللي عمره خمسين سنة، أنا اللي طلعته تريند - مع كامل احترامي ليه - فالواحد فيه اللي مكفيه، بلاش ترموا الناس بالتهم.. لو عاوزة أطلع تريند، أجيب لي شاب حلو من اللي مسمعين، وأطلع معاه موديل وأبقى تريند».

وأضافت: «اللي تفتكروه موسى يطلع فرعون، مفيش واحد هيمشي مع واحدة، وعنده زوجة أولى وهيأمنها ويتصور معاها، وهو بيحضنها ويبوسها، ويسيب الصور دي معاه، الزواج هو الإشهار بغض النظر إن كان عرفيا رسميا أيًا كان.. وكل عيلتي عارفة، وفيه مكالمات مسجلة مع الشقنقيري ووالدي ووالدتي.. أنا مش منحلة وماشية على حل شعري، مكالمته مع ماما مستجلة وبواب العمارة شاهد».

واستكملت: «من وقت ما عرفتك وأنا في مصايب ما عدا أول شهور اللي هي كانت حلاوة البدايات، فيما عدا ذلك مشفتش معاك شيء حلو، كنت بفضل مستنية بالساعات، وما تجيش، وكان نفسي أتكلم معاك، ما كانش من حقي، وحطيت في بقي جزمة قديمة، اديتك ورقتي الجواز عشان هبلة.. أنا من رابع المستحيلات أمشي مع حد في الحرام، ربنا قدر إني حبيتك، وما حدش يلومني، مفيش ست هتاخد راجل من واحدة، اتبهدلت وأنا كل عمري 29 سنة، وفترة عشريناتي راحت كلها مصايب ورا بعض مش بتقف».