«متهم بالاغتصاب».. تعليق وضع خالد سرحان في أزمة مع جمهور سعد لمجرد
هجوم لاذع تعرض له الفنان خالد سرحان من قبل شباب المغرب، وذلك بسبب فيديو عن أغنية من أول دقيقة، والتي غناها كلَا من الفنانة اللبنانية إليسا، والفنان المغربي سعد لمجرد، حيث تعرض للهجوم على الرغم من تراجعه واعتذاره.
وأكد الفنان خالد سرحان أنه لم يكن يعلم اسم المغني الذي يقدم الأغنية، وأن صديق له قد أخبره فقام بحذف الفيديو سريعًا.
ونشر خالد سرحان على حسابه الشخصي بموقع التواصل الاجتماعي فيس بوك تعليقه على ما حدث، حيث كتب: «في أغنية أنا اتريقت عليها في فيديو عندي على الصفحة امبارح.. الأغنية دي كانت تريند على تيك توك وانا بكل أمانة مش مميز غير صوت إليسا في الأغنية ومعرفش مين اللي بيغني معاها».
وتابع: «صديق ليا كلمني وبالصدفة بيقولي شفت الفيديو بتاعك على أغنية سعد لمجرد قفلت معاه ومسحت البوست في ساعتها انا الشخص ده ماكنتش اعرفه أصلا غير لما مره من كام سنة اتصور معايا في فرنسا وبعدها أصدقائي قالولي إن ده مغني واسمه سعد لمجرد».
وأضاف: «عشان كدا حابب اعتذر لمتابعيني وجمهوري اني ساهمت في إبراز شخص متهم بالاغتصاب في أكتر من دولة وبـ بنات كتير.. أنا مش بهاجم ولا حتى بتهم بس عالاقل مش هتسامح مع شخص متهم باتهامات لا تغفر زي دي ولسا لم تثبت براءته لحد دلوقتي .. بعتذرلكم تاني».
واستكمل: «من بعد ما ممسحت البوست بتاع أغنية سعد لمجرد وانا بواجه هجوم مش طبيعي من مجموعة كبيرة جدا من الشباب المغربي.. الحقيقة أنا مش لاقي أي تفسير لده، انا مهاجمتش رمز وطني مغربي ولا حتى هاجمت أي شخص انا خدت موقف إنساني طبيعي غير متعلق ولا بشخص ولا ببلد وأي حد مكاني لازم ياخد الموقف ده وإلا مش هيكون إنسان سوي.. أنا حتى لم اثبت اتهامات، أنا قولت ان الموضوع طالما فيه احتمال حتى لو ١٪ يكون مُدان بالتهم دي فعلا فأنا عن نفسي لازم اتجنب الشخص ده لحد ما اتأكد أنه برئ وبس».
واختتم: «أنا زُرت المغرب كتير والشعب المغربي من أقرب الشعوب لقلبي كرم وطيبة وذوق في التعامل، عشان كدا أنا مش زعلان منهم وأتمنى مايفهمونيش غلط، المغرب مش شخص. ومصر مش شخص، احنا بلاد كبيرة مينفعش نختزلها في فرد ممكن يخطئ أو يصيب».
