«أخويا توفي ومعرفناش نغسله وكفناه في بطانية».. شاهد| رد قاسي من أزهري

أجاب الشيخ محمد أبو بكر، على سؤال متصل يقول: "أخويا اتوفى من 6 شهور، معرفناش نغسله، لأننا عرفنا بعد الوفاة بـ 3 أيام، جبنا مغسل رفض يغسله، كفناه وحطيناه في بطانية، ووضعناه في القبر".

وقال الشيخ، خلال برنامج "إني قريب"، المذاع على قناة النهار: "دينك ضايع، اهتميت بفلوسك ومفردات مرتبك وسيبت دينك، وهذا خطأ كبير، فجبنا واحد معندوش ذمة من أهل الجهل والضلال، لأنه لو من أهل العلم كان قال معرفش".

وأضاف: "كنا اتصلنا بدار الإفتاء أو شيخ نثق فيه، إما أن نرش عليه بعض الماء، أو يُيمم، مينفعش واحد يدخل قبره، مش هنعرف نشيل الهدوم".

وتابع: "علامات الساعة موجودة بيننا بقوة في قطيعة الأرحام، ربنا كتر تليفوناتنا وقطع ودنا، معندناش وقت نتصل ونطمن على بعض، الأخ يموت 3 أيام وإحنا مندراش".

وأكمل: "لو فكرت تتصل بيه مكنش هيرد فقلبك يقلق وتشوف هو كويس ولا لأ، وهذه أيام لمن أراد أن يتعظ، أخوك ده هتتحاسب عليه، أنتوا اهتميتوا تخلصوا من الجثة، عشان ريحتها وحشة، مش تطبقوا شريعة ربنا".