«مراهن عليك».. كيف دعم «عادل إمام» أحمد سلامة في بداية حياته الفنية؟
قال الفنان أحمد سلامة: "اشتغلت مع الزعيم عادل إمام عددًا من الأفلام مثل المولد، واحنا بتوع الأتوبيس، وشياطين إلى الأبد".
رهان عادل إمام على أحمد سلامة
وأضاف خلال لقائه ببرنامج "الستات مايعرفوش يكدبو" المذاع على قناة "سي بي سي": "الزعيم عادل إمام قاللى أنا مراهن عليك أنت نجم مصر القادم، وأنا بحبه جدا من معاشرتي له عن قرب خاصة في السفر".
موقف إنساني للزعيم عادل إمام
وتابع: "الزعيم عادل إمام له معايا موقفين مقدرش انساهم لإنهم كانوا في الغربة، موقف وإحنا بنصور مشهد اللى بترمي فيه بالمياه في قبرص فدخلنا باليخت جوا البحر 2 كيلو وقتها كانت درجة الحرارة 6 تحت الصفر وبنصور المشهد بالليل الساعة 2 الصبح والناس واقفة فوق ملفوفين ببطاطين، وقالوا ليا اجهز علشان نعمل المشهد اللى بيعلقولك فيه رمانة وبتترمي فيه بالبحر فقلت لهم مش هاعمل المشهد دا انا اموت لو نزلت في التلج ده، وقتها نزلي سمير سيف وقال لي هو أنت مش قاري السيناريو فقلت له أنا قاري بس مش مكتوب في السيناريو أني هترمي في المية ودرجة الحرارة 6 تحت الصفر".
وشرح: "راحوا للفنان عادل إمام وقالوا له أحمد سلامة مش عايز يعمل المشهد، فكان رده عليهم انتم عايزين تموتوه طبعا لأ إزاي يعمل المشهد في التلج ده، وفعلا أنقذني بموقفه الإنساني معايا، وفعلا صورنا المشهد وإحنا على اليخت وكإنهم هيرموني بس منزلتش البحر".
وتابع: "الموقف الثاني للفنان عادل امام معايا، وأنا ماشي من الفندق لقيت عليا فلوس كتير جدا وكنت صرفت الفلوس اللى معايا وجبت هدايا ومش معايا فلوس، وقتها هو اللي انقذني وقاللي خد شنطتك واستناني ولما حاولت أرد له المبلغ رفض وقال لي ايه العبط ده والإنتاج هو اللي هيشيل".
